जयपुर । मूल प्रवाह अखिल भारत नेपाली एकता समाजले देशमा लोकतान्त्रिक गणतन्त्र खतरामा परे प्रवासी नेपालीहरू चुप लागेर नबस्ने चेतावनी दिएको छ ।
मूल प्रवाह जयपुर नगर समितिले आयोजना गरेको प्रेस सम्मेलनमा बोल्दै मूल प्रवाहका केन्द्रीय अध्यक्ष ठाकुर खनालले यस्तो चेतावनी दिनुभएको हो ।
मूल प्रवाह अखिल भारतीय नेपाली एकता समाज जयपुर उत्तर र दक्षिण नगर समितिले पिंक सिटी प्रेस क्लबमा पत्रकार सम्मेलन गरेको थियो ।
समाजका अध्यक्ष ठाकुर खनाल र उपाध्यक्ष कपिल खनालले पत्रकारहरूको प्रश्नको जवाफ दिनुभएको थियो । अध्यक्ष खनालले नेपालको वर्तमान अवस्थाको प्रकाश पार्दै नेपाल र भारतका जनताबीचको सम्बन्ध रोटी र बेटीमा मात्र सीमित नभएर एकअर्काको लोकतान्त्रिक आन्दोलनसँग पनि जोडिएको बताउनु भयो ।
खनालले भन्नुभयो, ‘भारतको स्वतन्त्रता आन्दोलनमा धेरै नेपाली नागरिकले सक्रिय सहभागिता जनाएका थिए । नेपालको लोकतान्त्रिक आन्दोलनमा भारतको जनसमर्थन पनि रह्यो । नेपाली जनताले आफ्नो बलिदान आन्दोलनको आधारमा १४० वर्ष पुरानो राजतन्त्रको अन्त्य गरी गणतन्त्र स्थापना गरी धर्मनिरपेक्ष, समावेशी र समानुपातिक संविधान निर्माण गरेका छन् ।’
उहाँले विदेशी शक्ति केन्द्रको दबाबले नेपालमा संघीयता लागू भएको स्पष्ट पार्दै आर्थिक, सामाजिक र रणनीतिक हिसाबले संघीय व्यवस्था नेपालको हितमा छैन भन्नुभयो । ‘त्यसैले नेपालमा संघीयताको अन्त्य गरी स्थानीय विकेन्द्रीकरणको आधारमा एकात्मक राज्य व्यवस्था स्थापना गर्नु उपयुक्त हुन्छ’
केही प्रतिगामीहरूले हिन्दू राज्यको आडमा नेपालमा गणतन्त्रलाई समाप्त गर्ने षड्यन्त्र भइरहेको भन्दै खनालले थप्नुभयो, ‘भारतका हिन्दुत्ववादी शक्तिहरूले नेपालका प्रतिगामीहरूलाई सहयोग र समर्थन गरिरहेका छन् । तर सचेत नेपाली जनताले त्यसो हुन दिँदैनन् । र, भारतका न्यायप्रेमी जनताले लोकतन्त्रको पुनर्स्थापनाको आन्दोलनमा जसरी सहयोग र समर्थन गरेका छन्, त्यसरी नै लोकतान्त्रिक प्रणालीको रक्षाका लागि पनि सहयोग र साथ दिनुहुनेछ भनी अपिल गर्दछौँ ।’
पत्रकार सम्मेलनमा आयोजकको तर्फबाट रिम राणाले प्रेस नोट प्रस्तुत गर्नु भएको थियो । कार्यक्रमको सञ्चालन बेलबहादुर रजाली, केन्द्रीय सदस्य मोहन गिरी, महिला विभागकी दिपा थापा र कल्पना थापाको सहभागिता रहेको थियो ।
यस्तो छ, प्रेस नोट
आदरणीय पत्रकार मित्रहरू,
नेपाल र भारतबीच परापूर्वकालदेखि नै मैत्रीपूर्ण सम्बन्ध रहँदै आएको छ । तीर्थयात्राका लागि अन्य देशमा पनि आवतजावत भएको छ । यसको मुख्य कारण धार्मिक मान्यता अनुसार नेपाल र भारतमा विभिन्न देवीदेवताका स्थान, गुम्बा र मन्दिर रहेका छन् । समयसँगै विभिन्न देशको सिमाना पनि स्पष्ट हुँदै गयो र सिमानालाई नियमन गर्न धेरै कानुन बने । धेरै देशहरूमा प्रवेशको लागि प्रवेशाज्ञा (विजा) को व्यवस्था गरे । तर नेपाल भारतको बीचमा भएको मित्रतालाई निरन्तरता दिन सन् १९५० मा नेपाल–भारत शान्ति तथा मैत्री सन्धि भएको थियो । उक्त सन्धिले एक अर्का देशका नागरिकलाई निर्बाध आवागमन, समान अवसर र अधिकार प्रदान गर्दछ।
मूल प्रवाह अखिल भारत नेपाली एकता समाज एउटा भारत सरकारमा पंजीकृत सामाजिक संस्था हो। संस्थाले भारतमा रहेका नेपालीको हक हित, सामाजिक उत्थान र नेपाल एवं भारतका जनताबीचको मित्रतालाई मजबुत बनाउने काम गर्दै आएको छ ।
एकातिर पुँजीवादको विकाससँगै मानव समाजले धेरै फाइदा पनि पाएको छ । विज्ञानको विकाससँगै कलकारखाना, यातायात, सूचना प्रविधि, शिक्षा, स्वास्थ्य आदि क्षेत्रमा क्रान्तिकारी परिवर्तन भएसँगै मानव जातिको प्रगतिसँगै सुविधा पनि उपलब्ध भएको छ ।
तर यसका केही साइड इफेक्ट पनि भएका छन्, समाजमा मानवता र नैतिक मूल्यमान्यतामा पनि ह्रास आएको छ र विकृति फैलिरहेको छ । सबै कुरालाई पैसासँग तुलना गर्न थाल्यो, पैसा नै सबै थोक हो, सुख, आराम, इज्जत सबैथोक आदि । जसका कारण समाजमा भ्रष्टाचार, चोरी, डकैती, हत्या लगायतका घटनाहरु पनि बढेका छन् । हाम्रो संस्थाले सामाजिक उत्थानका लागि काम गर्छ । त्यसैले कुनै पनि समाज विरोधी र गैरकानूनी कार्य भ्रत्सना गर्दछ । जो सुकै समाज विरोधी र गैरकानूनी गतिविधिमा संलग्न भएको हुन्छ त्यसलाई कानुनी कारबाही हुनुपर्छ भन्ने हाम्रो मान्यता हो ।
निस्सन्देह, चोरी, डकैती वा हत्या जस्ता गैरकानूनी गतिविधिमा संलग्न जोसुकै अपराधी हो र अपराधीको कुनै जात वा समुदायको हुँदैन। उ अपराधी हो र कार्वाहीको योग्य छ। कतिपय घटनामा नेपाली समुदायका व्यक्तिको नाम पनि देखिएको छ । जसका कारण प्रशासन र केही सञ्चारमाध्यमले यसलाई सम्पूर्ण नेपाली समुदायसँग जोड्न खोज्दै छ र आम नेपाली समुदायलाई नै निशाना बनाएका छन् ।
कुनै पनि व्यक्तिले गरेको अपराधको लागि आम नेपाली समुदायलाई बदनाम गर्न र हैरानी नगर्न प्रशासन, सञ्चारमाध्यम र सर्वसाधारणलाई अनुरोध गर्दछौं। कुनै पनि घटनाको निष्पक्ष छानबिन गरी दोषीमाथि कडा कारबाही होस् । हामी नेपाली समुदायलाई कुनै पनि प्रकारका असमाजिक र शङ्कास्पद व्यक्तिहरूबाट टाढा रहन आग्रह गर्दछौं। यस्ता व्यक्तिको जानकारी प्रहरी प्रशासनलाई दिनुहोस्।
