एमसीसीविरुद्ध २२ भदौको कार्यक्रम सफल पार्न अध्यक्ष केसीको अपिल

  •   
  •  
  •  
  •  
  •  
  •  

387 जनाले पढ्नु भयो ।

काठमाडौं । राष्ट्रिय जनमोर्चाका अध्यक्ष चित्रबहादुर केसीले यही भदौ २२ गते एमसीसीविरुद्ध आयोजना गरिएको आन्दोलनको कार्यक्रम सफल पार्न अपिल गर्नुभएको छ ।

आइतबार वक्तव्य प्रकाशित गरी अध्यक्ष केसीले भदौ २२ गते एमसीसी विरुद्ध देशव्यापी सांकेतिक विरोधको कार्यक्रम गर्ने जानकारी दिँदै कार्यक्रम सफल पार्न अपिल गर्नुभएको हो ।

उक्त दिन कम्तिमा जिल्लामा विरोध सभा, जुलुस, कोणसभा, अन्तरक्रिया, गोष्ठि आदि कुनै पनि प्रकारको विरोधको कार्यक्रम गर्ने राजमोले जनाएको छ ।

‘लामो समयसम्म हिंसात्मक संघर्ष, राष्ट्रिय विखण्डनको षड्यन्त्र र अस्थिर राजनीतिबाट मर्माहत भएको स्थितिमा एमसीसीलाई अनुमोदन गर्नासाथ परिस्थिति झन खराब हुनेछ’ केसीले प्रेशित गर्नुभएको वक्तव्यमा उल्लेख छ ।

यस्तो छ प्रेस वक्तव्य :

‘आगामी भाद्र २२ गते एमसिसी विरुद्ध देशव्यापी सांकेतिक विरोधको कार्यक्रम सफल पार्न अपील !

गठबन्धनको सरकारले जारी गरेको न्यूनतम कार्यक्रममा एमसिसी समावेश भएको छैन । एमसिसी वा त्यस्तै गम्भीर प्रकृतिका र विवादास्पद विषयहरु सरकारले यो अवधिमा नउठाउने एक प्रकारको भद्र सहमति हो । तर केही दिन यता राष्ट्रिय जनमोर्चा बाहेकका गठबन्धनका दलहरु बीच एमसिसीबारे छलफल भएको, एमसिसीको विज्ञापन प्रसारण भएको, एमसिए अमेरिकाका उपाध्यक्ष चाडै नेपाल आउने, अमेरिकाले एमसिसीलाई संसदबाट पारीत गराउन दिएको दबाब र चर्चाले एमसिसीलाई पारित गर्न चलखेल भएको सहज रुपमा अनुमान गर्न सकिन्छ ।

अब यो आम रुपमा स्वीकार भइसकेको छ कि एमसिसी नेपालको राष्ट्रियता, सार्वभौमिकता र हितको विरुद्ध छ । त्यसको साथै एमसिसी इन्डोप्यासिफिक रणनीतिको अंग हो । त्यो कुरा अमेरिकाका उच्च अधिकारीले स्वीकार गरिसकेका छन् । ओली सरकारको पालामा त्यो सरकारले एमसिसीबारे अध्ययन गर्न गठन गरेको कार्यदलले समेत उक्त सम्झौता यथास्थितिमा पारित गर्न नहुने प्रतिवेदन दिएको छ । वास्तवमा एमसिसी हिन्द प्रशान्त क्षेत्रका देशहरुमा चीन विरोधी मोर्चा बनाउने षड्यन्त्र हो । यदि हामी त्यसमा सामेल भयौँ भने हाम्रो असंलग्न परराष्ट्र नीति समाप्त हुन्छ । त्यो स्थितिमा नेपालले साम्राज्यवादीहरुको युद्ध, अन्तर्राष्ट्रिय राजनीतिको अनावश्यक तनाव बढ्ने र देशभित्र राजनीतिक दल, सरकार र जनता बीच असमझदारी बढ्छ । लामो समयसम्म हिंसात्मक संघर्ष, राष्ट्रिय विखण्डनको षड्यन्त्र र अस्थिर राजनीतिबाट मर्माहत भएको स्थितिमा एमसिसीलाई अनुमोदन गर्ना साथ परिस्थिति झन खराब हुनेछ ।

अहिले २२ राजनीतिक दल तथा संगठन, पत्रकार जगत, नागरिक समाजबाट समेत यसको व्यापक विरोध र संघर्ष हुँदै आएको छ । राष्ट्रिय जनमोर्चाले एमसिएका उपाध्यक्षको आगमन, नेपाललाई एमसिसी पारित गर्न दिएको दबावका विरुद्ध र स्वयं गठबन्धनको सरकारलाई सचेत पार्न यही भाद्र २२ गते सांकेतिक रुपमा देशव्यापी विरोधका कार्यक्रमहरु गर्ने निर्णय गरेको छ । उक्त दिन कम्तिमा जिल्लामा विरोध सभा, जुलुस, कोणसभा, अन्तरक्रिया, गोष्ठि आदि कुनै पनि प्रकारको विरोधको कार्यक्रम गर्नु पर्दछ । उक्त कार्यक्रमहरुलाई सफल पार्न पार्टीका सबै तहका समिति, कार्यकर्ता, जनवर्गीय संगठन तथा जनसमुदायहरुसँग हार्दिक अपील गर्दछौँ । यसको साथै एमसिसीको विरोधमा सबै संगठन, जनतप्का तथा राजनीतिक दलहरुको संघर्षप्रति हाम्रो समर्थन रहने कुरा जानकारी गराउँछौँ ।’

२०७८ भदौ २० गते
चित्रबहादुर के.सी.
अध्यक्ष

Leave a Reply

Your email address will not be published. Required fields are marked *