मुकुन्दराज रोका
अँध्यारोले पनि एक दिन उज्यालो बालेर आउँछ ।
कतैबाट अँध्यारो नछिर्ने गरी उसले टालेर आउँछ ।१।
अहो ! वर्गीय विसमताले कति जरो गाडेको रुख झै ।
जति गाडोस् के वर्गसंघर्षले सबै उखालेर आउँछ ।२।
आर्थिक क्रान्तियुगमा कसरी छौं भन्छौ हेर यहाँ ।
मान्छेले एक बोतल रक्सीमा भोट हालेर आउँछ ।३।
सुन र पितलका मात्रै किन चर्चा गरेका छौं तिमी ?
यहाँ माक्र्सवादमा पनि संशोधनवाद गालेर आउँछ ।४।
जुवाडेले मात्र हो र कहिले जित्ने कहिले हार्ने त्यो ।
क्रान्ति पनि जुवा हो कि जितेर कि फालेर आउँछ ।५।
गहिराइले स्वयम् गहिराइलाई डुबानमा पारेको छ ।
भन्देऊ न माझी डुङ्गा कहिले किनार चालेर आउँछ ।६।
