जमुना रोकाको राप्तिमा अन्त्येष्टि, राजमोको झण्डा ओढाएर अन्तिम श्रद्धाञ्जली

1871 जनाले पढ्नु भयो ।

दाङ । बिहीबार त्रिशुलीमा जिप खसेर भएको दुर्घटनामा मृत्यु भएकी जमुना रोकाको भालुवाङस्थित राप्ति किनारमा अन्त्येष्टि गरिएको छ ।

शुक्रबार बिहान भएको अन्त्येष्टिमा राष्ट्रिय जनमोर्चाका कार्यकारी अध्यक्ष रश्मीराज नेपाली, उपाध्यक्ष एवं सांसद दुर्गा पौड्याल राजमो नेता बमबहादुर खत्री र कृष्ण खड्का तथा अखिल नेपाल युवक संघका महासचिव कृष्णराज पाण्डेले रोकाको पार्थिव शरीरमा राजमोको झण्डा ओढाएर अन्तिम श्रद्धाञ्जली दिनुभएको थियो ।

त्यस क्रममा शोक मन्तव्य व्यक्त गर्दै राजमो उपाध्यक्ष पौडेलले जमुना रोकाको गाउँसमाजमा राम्रो छवि भएकी र समाजलाई नेतृत्व गर्न सक्ने क्षमता भएकी कार्यकर्ता भएको उल्लेख गर्दै उहाँको निधनल पार्टी स्तब्ध भएको बताउनुभयो । पौडेलले जमुना रोकाको निधनले परिवारसँगै पार्टीलाई पनि अपूरणीय क्षति पुगेको उल्लेख गर्नुभयो ।

अखिल (छैठौं) का केन्द्रीय सचिव सुवाश जिसीले सञ्चालन गर्नुभएको शोकसभामा राजमोका सयौं नेता कार्यकर्ता तथा स्थानीयको उपस्थिति रहेको छ ।

२६ वर्षीया जमुना प्युठानको झिम्रुक गाउँपालकिा–७ का रामबहादुर रोकाको जेठी छोरी हुनुहुन्थ्यो । दुई दिदी बहिनी र तीन दाजुभाइमध्येकी जेठी जमुनाले बालशिक्षा उमावि मच्छिबाट कक्षा १२ सम्मको अध्ययन गर्नुभएको थियो । जमुनाका दुई छोराछोरीमध्ये जेठी छोरी जेनिसा उहाँसँगै दुर्घटनामा परेर त्रिशुलीमा हराइरहेकी छन् । उनको खोजी जारी छ । उहाँका १२ वर्षीया छोरा ज्याक छन् । राजमोकी साधारण सदस्य रहेकी जमुना युवक नेता मुकुन्द रोकालाई राजनीतिमा अगाडि बढाउने प्रेरणास्रोत हुनुहुन्थ्यो ।

यता, जमुनासँगै दुर्घटनामा मृत्यु भएका चालक सूर्य केसीको निधनले प्युठानको सौतामारे शोकमग्न भएको छ । केसीको शव अन्तिम संस्कारका लागि प्युठान लगिएको छ । उहाँका बुवा वैदेशिक रोजगारमा रहेकाले बुवा आएपछि नै अन्त्येष्टि हुने विद्यार्थी नेता सुवाश जिसीले जानकारी दिनुभयो । उहाँको प्युठानको सौतामारे फेदीस्थित गर्तङ खोलामा अन्त्येष्टि हुनेछ ।

अखिल नेपाल युवक संघका स्थानीय नेतासमेत रहेका केसीको निधनबाट सिंगो संगठन स्तब्ध भएको जिसीले बताउनुभयो ।

अखिल नेपाल युवक संघका उपाध्यक्ष मुकुन्द रोकाको परिवार चढेको लु.१ च. ९७३१ नम्बरको जिप बिहीबार बिहान ५ बजे मुग्लिनदेखि २ किलोमिटर कुरिनटारतर्फ त्रिशुलीमा खसेको हो । जिपमा सवार युवक संघका उपाध्यक्ष मुकुन्द रोकाकी श्रीमती जमुना रोका, छोरी जेनिसा र चालक सूर्य केसी बेपत्ता भएकोमा जिसँगै जमुना र चालक केसीको शव फेला परेपनि बालिका हराइरहेकी छन् ।

उपाध्यक्ष रोका नदीमा पौडेर बाहिर निस्कन सफल हुनुभएको थियो । उहाँको चितवनको पुरानो मेडिकल कलेजमा उपचार भइरहेको छ ।

Leave a Reply

Your email address will not be published. Required fields are marked *