मसाल भन्छ : एमसिसि पास गर्न सरकारले अमेरिकी पक्षले पुनः नेपालमा त्यो सम्झौताको कार्यान्वयनको लागि चलखेल हुँदैछ

  •   
  •  
  •  
  •  
  •  
  •  

659 जनाले पढ्नु भयो ।

नेपाल कम्युनिष्ट पार्टी (मसाल) ले अमेरिकी पक्षले नेपालको संसदबाट एमसीसी पास गर्न फेरि चलखेल गरेको भन्दै आपत्ति जनाएको छ । सोमबार प्रवक्ता रामप्रकाश पुरीले विज्ञप्ति प्रकाशित गरी अमेरिकी साम्राज्यवादको षडयन्त्रप्रति सचेत रहन आग्रह गर्नुभएको छ ।

नेपाली जनताको व्यापक विरोधपछि संसदीय प्रक्रियामा जानबाट रोकिएको एमसीसी पास गर्न अमेरिकाले फेरि दबाब दिएको छ । हालैमात्र अमेरिकी राजदूत रेन्डि बेरीले रक्षामन्त्री ईश्वर पोखरेललाई भेटेर एमसीसी छिटो पारित गर्न दबाब दिएका थिए ।

मसालले अमेरिकी राजदूतको चलखेलप्रति आपत्ति जनाउँदै ‘त्यसले नेपालको सार्वभौमिकताका विरुद्ध एमसीसीको आवरणमा अझै षडयन्त्र जारी रहेको’ बताएको छ । प्रवक्ता पुरीले वक्तव्यमा ‘नेपाल सरकारलाई नेपाली जनताको भावना विपरित त्यो सम्झौताका पक्षमा कार्य नगर्न र देशको सार्वभौमिकतालाई रक्षा गर्नका लागि जनताको साथमा रहेर काम गर्न सुझाव पनि’ दिनुभएको छ ।

यस्तो छ वक्तव्यः
‘मिलिनियम च्यालेन्ज कर्पोरेशन (एमसीसी) सम्झौताको विरुद्धमा नेपालमा विरोध र आन्दोलन हुँदै आएको छ । एमसीसी सम्झौताले नेपालको सार्वभौमिकतालाई चुनौति दिएकोले त्यसलाई नेपालको संसदबाट पारित गर्नबाट रोक्न विगतमा जनताको व्यापक आन्दोलन भएको कुरा स्पष्ट छ । एमसीसी इण्डोप्यासिफिक रणनीतिको अंग भएको र त्यसले हाम्रो देशको असंलग्न परराष्ट्र नीतिलाई समाप्त पारी अमेरिकी साम्राज्यवादी पक्षमा सामेल गराउने सक्ने चेतावनी दिँदै त्यसका विरुद्धमा नेपालमा संघर्ष हुँदै आएको छ । सरकारले त्यो सम्झौतालाई पहिले नै नेपालको संसदबाट पारित गर्न खोजेको भएपनि नेपाली जनताको व्यापक विरोध र संघर्षका कारण अहिलेसम्म त्यसलाई पारित गर्न सरकारलाई सम्भव भएको छैन ।

पछिल्लो समयमा “अमेरिकी पक्षले पुनः नेपालमा त्यो सम्झौताको कार्यान्वयनको लागि चासो राखेको र नेपाल सरकारका अधिकारीहरुले त्यससम्बन्धी गम्भीर छलफल गरिरहेको र चिन्तित हुनुपर्ने अवस्था नरहेको” भन्ने समाचार सार्वजनिक भएका छन् । यसको अर्थ एमसीसी सम्झौतालाई नेपालको संसदबाट पारित गराउनका लागि अमेरिकी पक्ष तथा नेपालको सरकारले पनि बिभिन्न चलखेल गरिरहेको कुरा प्रष्ट हुन्छ । हामीले आफ्नो देशको सार्वभौमिकता, स्वतन्त्रता तथा स्वाधीनताको दृष्टिबाट नेपाल सरकारलाई बारम्बार त्यो सम्झौताको राष्ट्रघाती पक्षमाथि विचार गरी त्यसलाई पुरै खारेज गर्नका लागि बारम्बार ध्यान आकर्षण गराउनका साथै संघर्ष र आन्दोलन गर्दै आएका छौं । एमसीसी सम्झौता कार्यान्वयनको विषय उत्पन्न भएपछि शुरुमा अमेरिकी अधिकारीहरुबाट नै त्यो इण्डोप्यासिफिक रणनीतिको अंग भएको भन्ने भनाइहरु सार्वजनिक भएका थिए । पछि त्यसबारे नेपालमा व्यापक विरोध भएपछि नेपाली जनतालाई गुमराहमा राख्दै नेपालको सरकार तथा स्वयम् अमेरिकी पक्षबाट समेत ढाकछोप गर्ने काम हुँदै आएको छ ।

अहिले एमसीसी सम्बन्धी अमेरिकी चासो र नेपालका अधिकारीहरुले त्यो सम्झौता कार्यान्वयन गर्नका लागि देखाएको प्रतिवद्धताबारे जुन समाचार प्रकाशित भएका छन्, त्यसले नेपालको सार्वभौमिकताका विरुद्ध एमसीसीको आवरणमा अझै षडयन्त्र जारी रहेको कुरा अवगत हुन्छ । त्यसप्रकारको कार्य नेपालको सार्वभौमिकता विरुद्ध गरिने षडयन्त्र हो र त्यसलाई हामीले विरोध गर्दछौं । यसका साथै हामीले नेपाल सरकारलाई नेपाली जनताको भावना विपरित त्यो सम्झौताका पक्षमा कार्य नगर्न र देशको सार्वभौमिकतालाई रक्षा गर्नका लागि जनताको साथमा रहेर काम गर्न सुझाव पनि दिन चाहन्छौं । तर सरकारले त्यसो नगरेमा देशभक्त नेपाली जनताले संघर्ष गरेर नै देशको सार्वभौमिकता र स्वाधीनताको रक्षा गर्नुपर्ने आवश्यकता छ । जनताको आन्दोलनले नै देशको सार्वभौमिकताको रक्षा गर्नेछ भन्ने हामीलाई पुरा विश्वास छ । हामीले सम्पूर्ण जनतालाई त्यसका लागि सजक र सर्तक रहन आव्हान गर्दछौं ।’

Leave a Reply

Your email address will not be published. Required fields are marked *