राजमो सांसद जिसीको आपत्ति

  •   
  •  
  •  
  •  
  •  
  •  

5258 जनाले पढ्नु भयो ।

बुटवल । राष्ट्रिय जनमोर्चा ५ नं प्रदेशका सांसद तारा जिसीले कान्तिपुर अनलाइनमा प्रकाशित समाचारप्रति आपत्ति जनाउनुभएको छ ।

कान्तिपुर अनलाइनले आज प्रकाशित गरेको ‘प्रदेश ५ को राजधानी देउखुरीमा प्रस्तावः नेकपा बाहेकका सबै दलको विरोध’ शिर्षकको समाचारमा राजमोले पनि असहमति जनाएको उल्लेख गरिएको प्रति सांसद जिसीले विरोध गर्नुभएको हो ।

कान्तिपुरको समाचारमा उल्लेख छ, ‘राष्ट्रिय जनमोर्चाका प्रदेशसभा सदस्य तारा जिसीले संघीयता महंगो भएका बेलामा पूर्वाधार नै नभएका ठाउँमा राजधानी तोक्दा थप ढुकुटी रित्तिने बताइन् । ‘अस्थायी मुकाममा करोडौं खर्च गरेर फेरि नयाँ ठाउँमा जानु उचित छैन,’ उनले भनिन्, ‘यसको विरोध गर्नेछु ।’

सांसद जिसीले सो समाचार असत्य र निराधार भएकोले घोर आपत्ती प्रकट गर्दै खण्डन गर्नुभएको हो । ‘

कान्तिपुर जस्तो स्थापित पत्रिकाले कसैको मान मर्दन हुने गरि समाचार प्रकाशित गर्नु खेदजनक छ’ जिसीले शनिबार प्रेसित गर्नुभएको वक्तव्यमा उल्लेख छ ।

‘नामाकरण र स्थाई राजधानीको सन्दर्भमा त्यस सम्बन्धि समिति बन्ने प्रस्ताव आउँदैका दिन २०७५ साउन २४ गते नै राष्ट्रिय जनमोर्चाको त्यस सम्बन्धि धारणा प्रदेश ५ को सदनमा राख्दै प्रदेशको लुम्बिनी नामाकरण र राजधानीको लागि अधिकार सम्पन्न विशेषज्ञहरूको टोलीलाई जिम्मा दिई त्यसैको प्रतिवेदनको आधारमा स्थायी मुकाम निर्धारण गरिनु पर्दछ, त्यो विकल्प नै सबैभन्दा उचित,कम खर्चिलो,छिटो छरितो र विना विबादित हुन सक्थ्यो भनेकि थिए’ सांसद जिसीले भन्नुभएको छ, ‘हाम्रो पार्टीको राजधानी सम्बन्धी यो धारणा आज पनि कायम छ । विराेध वा समर्थन भनी हाम्रो पार्टीको नाम जाेडिनु सरासर गलत र खेदजनक छ।’

प्रदेश ५ को राजधानी बुटवलबाट दाङको भालुवाङ सार्ने निर्णयपछि बुटवलमा विरोध प्रदर्शन जारी छ । कांग्रेसका भातृ संगठनहरुले शनिबार पनि बुटवलमा प्रदर्शन गरेका छन् ।

प्रदेश ५ मा नेपाल कम्युनिस्ट पार्टी (नेकपा) का ६१, विपक्षी नेपाली कांग्रेसका १९, जनता समाजवादी पार्टीका ६ र राष्ट्रिय जनमोर्चाका १ सहित ८७ जना सभासदहरु रहेका छन् ।

Leave a Reply

Your email address will not be published. Required fields are marked *