वरिष्ठ कम्युनिस्ट नेता मोहनविक्रम सिंह सम्मानित

  •   
  •  
  •  
  •  
  •  
  •  

313 जनाले पढ्नु भयो ।

प्रकाश जिसी/महोत्तरी ।।
नेकपा (मसाल) का महामन्त्री वरिष्ठ कम्युनिस्ट नेता मोहनविक्रम सिंह आधारशीला परिवारबाट सम्मानित हुनुभएको छ ।

महोत्तरीको बर्दीबास नगरपालिका वडा नम्बर ३, गौरीडाँडामा रहेको १५ परिवार सम्मिलित आधारशीला परिवारले आफ्नो अठाह्रौँ स्थापना दिवसको अवसरमा फागुन ११ गते मोहनविक्रम सिंहसहित बयोवृद्ध कम्युनिस्ट नेता कृष्णराज बर्मालाई पनि सम्मान गरेको हो ।

परिवारको प्राङ्गणमा बृहत् सम्मान समारोह आयोजना गरिएको थियो ।

आधारशीला परिवारले कम्युनिस्ट नेताहरू विष्णुबहादुर मानन्धर र कमल कोइरालालाई सम्मान गर्ने कार्यक्रम राखिएको भए पनि बिरामीको कारण उहाँहरू उपस्थित हुन सक्नुभएको थिएन ।

सम्मान कार्यक्रममा बोल्दै मोहनविक्रम सिंहले विश्वमा लगातार समाजवाद स्थापनाको धेरै प्रयत्न भएको बताउनुभयो । कम्युनिस्ट आन्दोलनमा निरन्तरता धेरै जटिल बन्ने गरेको उल्लेख गर्दै निरन्तरताले नै आन्दोलन अगाडि बढाउन सकिने बताउनुभयो ।

उहाँले नेपाल र विश्व कम्युनिस्ट आन्दोलनको पतन, विचलन, पलायन र अवसरवादको इतिहासको कुनै कमी नभएको चर्चा गर्नुभयो । सिंहले अबको कम्युनिस्ट आन्दोलन नयाँ पिंढीमा निर्भर रहेको बताउनुभयो ।

सिंहले कम्युनिस्ट आन्दोलनमा सामाजिक जीवन र व्यक्तिगत जीवनको अन्तर पहिल्याउन नसक्नु, व्यक्तिगत स्वार्थ हावी हुँदै जानु कम्युनिस्ट आन्दोलनको समस्या भएको बताउनुभयो ।

कम्युनिस्टहरूले सामूहिक पद्धति अपनाउने कुराले राष्ट्रिय महत्त्व राख्ने बताउनुभयो । समाजमा व्यक्तिगत स्वार्थ र सामाजिक स्वार्थको बीचमा संघर्ष हुने बताउनुभयो । उहाँले व्यक्तिगत हितको लागि सामाजिक स्वार्थमाथि कुठाराघात हुँदा कम्युनिस्ट आन्दोलनमा पतन हुँदै भएको बताउनुभयो ।

सिंहले कम्युनिस्ट आन्दोलनमा अध्ययनको पाटो बाहिरिंदै गएकोले समाजमा प्रतिक्रियावादी सोचाइ हावी हुँदै गएको उल्लेख गर्नुभयो । उहाँले अध्ययन नगर्दा प्रतिक्रियावादी समाज हावी हुँदै जाने बताउनुभयो ।

कार्यक्रममा बोल्दै कृष्णराज वर्माले कम्युनिस्ट आन्दोलन धेरै कठिन भएको बताउँदै कम्युनिस्ट आन्दोलनले निरन्तरता र निष्ठा खोज्ने बताउनुभयो । निष्ठाबाट विचलित हुँदा कम्युनिस्ट आन्दोलन कमजोर बन्दै गएको बताउनुभयो ।

आफ्नो समयको स्मरण गर्दै बर्माले ‘सुरुमा तीन जनाको सेल बनाउन पनि तीनचार महिना लाग्ने र लगातार प्रशिक्षण गर्ने गरिन्थ्यो, सही मान्छे खोज्नको लागि गाउँगाउँमा पुगिन्थ्यो’ भन्नुभयो । त्याग, तपस्या र बलिदानले नेपालको कम्युनिस्ट आन्दोलन अगाडि बढेको बताउनुभयो ।

सम्मानित मोहनविक्रम सिंह र कृष्णराज वर्माले आधारशीलाको भवनमा स्थापना गरिएको पुस्तकालयको संयुक्त रूपमा उद्घाटन गर्नुभएको थियो भने नारायणकाजी श्रेष्ठले आधारशीलाको वेबसाइटको उद्घाटन गर्नुभएको थियो ।

मोहनविक्रम सिंहको बारेमा माधव कोइराला, कमल कोइरालाको बारेमा धनगढी नगरपालिकाका प्रमुख हरिनारायण चौधरी, कृष्णराज बर्माको बारेमा शङ्कर महतो, विष्णुबहादुर मानन्धरको बारेमा विदुर खरेलले सङ्क्षिप्त राजनीतिक योगदान प्रस्तुत गर्नुभएको थियो ।

सम्मान कार्यक्रमको प्रमुख अतिथि नेकपाका प्रवक्ता नारायणकाजी श्रेष्ठ रहनुभएको थियो भने संस्कृतिविद् हरिगोविन्द लुइँटेल, अखिल (छैठौं) का अध्यक्ष विमल पोखरेल, नेकपा प्रदेश नं. २ का इन्चार्ज विश्वनाथ शाह, केन्द्रीय सदस्य शत्रुघन महतो, प्रकाश पोखरेललगायत नेकपाका नेताहरूले आतिथ्यता गर्नुभएको थियो ।

सिराहाको गोलबजारमा २०५९ मा स्थापना भएको आधारशीला परिवार २०६५ साकमा बर्दिबासमा करिब १५ कठ्ठामा आफ्नै जग्गामा स्थानन्तरण गरिएको थियो । पूर्वशिक्षामन्त्री गिरिराजमणि पोखरेल आधारशीलाको संस्थापक अध्यक्ष रहनुभएको थियो । परिवारमा हाल १५ परिवारका ४५ जनाको सामूहिक बसोबास रहेको छ । चार वटा ट्रस्ट, एउटा पुस्तकालय र एउटा अतिथिगृहको निर्माण गरिएको छ । आधारशीला परिवारका सबै बालबालिकाले स्थानीय जनता माध्यमिक विद्यालयमा अध्ययन गर्दछन् ।

आधारशीलाका अध्यक्ष दीपबहादुर योन्जनको सभापतित्वमा भएको सम्मान कार्यक्रमको सञ्चालन पेशल खतिवडा र स्वागत परिवारकी संस्थापक पुष्पलता घिमिरेले गर्नुभएको थियो ।

कार्यक्रममा कम्युनिस्टको अन्तर्राष्ट्रिय गीत प्रस्तुत गरिएको थियो ।

Leave a Reply

Your email address will not be published. Required fields are marked *