विपदबाट बच्न ग्रामीण बस्ती विकास गर्नु पर्ने राजमोको ठहर

  •   
  •  
  •  
  •  
  •  
  •  

679 जनाले पढ्नु भयो ।

काठमाडौं । राष्ट्रिय जनमोर्चाले देशका विभिन्न भागमा गएको बाढी र पहिरोबाट जनधनको क्षति भएकोप्रति दुःख व्यक्त गरेको छ ।

अध्यक्ष चित्रबहादुर केसीले शनिबार एक विज्ञप्ति प्रकाशित गरी विपदबाट पूर्वतयारी गर्न र जोगिन सुगम र सुरक्षित ठाउँमा ग्रामीण बस्ती विकास गर्न जोड दिनुभएको छ ।

यस्तै, वक्तव्यमा केसीले भारतीय च्यानलहरुले नेपालविरुद्ध गरिरहेको पित पत्रकारितालाई नेपालमा प्रशारण रोक्न केवल नेटवर्क व्यवसायीहरुले गरेको प्रयासको सराहनासमेत गर्नुभएको छ ।

वक्तव्यमा भनिएको छः

‘१) यही असार २५ र २६ गते भारी वर्षाका कारणले बाढी र पहिरोमा परी म्याग्दी, कास्की, सिन्धुपाल्चोक, गुल्मी, जाजरकोट लगायतका जिल्लाहरूमा ठुलो जन, धनको क्षति भएको छ । अझ कैयौँ व्यक्तिहरू बेपत्ता छन् । केही दिन अगाडि पनि बाढी, पहिरोका कारण जन, धनको क्षति भएको थियो । त्यसरी बाढी, पहिरोमा परी मृत्यु हुनेहरूप्रति हार्दिक श्रद्धाञ्जली व्यक्त गर्दछौँ । शोक सन्तप्तप्रति समवेदना प्रकट गर्दछौँ । ती ठाउँहरूमा तत्काल उद्दार गर्न र राहतको व्यवस्था गर्न सरकारसँग माग गर्दछौँ । पार्टी सदस्य, कार्यकर्ता तथा समितिहरूलाई पनि उद्दार कार्य र राहत कार्यमा जुट्न अनुरोध गर्दछौँ ।

२) नेपालमा बाढी, पहिरो र डुबानको समस्या नयाँ होइन । प्रायः वर्षेनी यस प्रकारले ठुलो जन, धनको क्षति हुने गरेको छ । दुर्गम पहाडी क्षेत्रमा मात्र होइन नगरपालिका घोषणा गरिएका क्षेत्रमा पनि बाढी, पहिरोका घटनाहरू भएका छन् । तराईमा नदी कटान र डुबानका समस्याहरू भइरहेका छन् । तर, सरकारले यसबारे न राम्रो पूर्व तयारी गर्ने गरेको छ, न दीर्घकालीन समाधानको योजना बनाएको छ । हामीले प्राकृतिक प्रकोपका लागि पूर्व तयारी गर्न र दीर्घकालीन समाधानका लागि जोड दिँदै आएका छौँ । बाढी, पहिरोका जोखिममा रहेका र छरिएर रहेका घर वस्तिहरूमा बिजुली, पानी, बाटो आदि आधारभूत संरचना निर्माण गर्न वा सुविधा पुर्‍याउन ठुलो खर्च समेत लाग्ने हुनाले त्यसको समाधानको लागि सुगम र सुरक्षित ठाउँमा ग्रामीण वस्ति विकास गर्न हामीले जोड दिँदै आएका छौँ ।

३) अहिले कोशी र नारायणी नदीमा पानीको वहाव खतराको विन्दु भन्दामाथि पुगेको छ । ठुलो वर्षा अझै जारी छ । कोशी ब्यारेजको संरचना भारतीय पक्षको अधीनमा छ । कोशी ब्यारेजका ५६ वटा ढोकाहरूमध्ये ३३ वटा ढोकाहरू मात्र खोलिएको स्थिति छ र त्यहाँ कैयन् बस्ती डुबानमा पर्ने गम्भीर खतरा छ । नारायणी नदी किनार र भैसालोटनको पश्चिमतर्फका बस्ती र खेतीपातीमा ठुलो नोक्सान हुने स्थिति छ । भारतले अन्तर्राष्ट्रिय सिमा सम्बन्धी प्रोटोकलको उल्लङ्घन गर्दै नेपालको सिमाना नजिकै निर्माण गरेका बाटो, बाध आदिले पनि वर्षेनी नेपालतर्फको जमिन ढुबानमा पर्ने गरेको छ । नदी, खोलाको प्राकृतिक वहावलाई रोकेर नेपालको वर्षेनी ठुलो जन, धनको क्षति हुने गरेको छ । यसतर्फ हामीले सरकारको गम्भीर ध्यान आकर्षण गर्न चाहन्छौँ । जनस्तरमा पनि भारतीय साम्राज्यवादको अन्यायपूर्ण कार्यका विरुद्ध ऐक्यवद्धताको आवश्यकतामाथि जोड दिन्छौँ ।

४) भारतीय संचार मिडियाहरूले नेपालका प्रधानमन्त्री केपी ओली र नेपाल सरकारका विरुद्ध तथ्यहीन, भ्रामक र अनर्गल प्रचारको अभियान नै चलाएका छन् । त्यसले नेपालको स्वतन्त्रता, सार्वभौमिकता र स्वाभिमानमा समेत आँच पुर्‍याएको छ । छिमेकी मित्र देश चीनसँगको नेपालको सम्बन्धका बारेमा तथ्यहीन समाचार सम्प्रेषण गरिएको छ । त्यसले ती मिडियाहरूको निम्न स्तर वा पीत पत्रकारितालाई जनाउँछ । भारतको प्रेस कानुन र व्यवस्थापन निम्न स्तरको छ वा भारत सरकारले नै त्यसरी नेपालका विरुद्ध अनर्गल प्रचार गर्न उक्साएको छ । यसले दुई देश बिचको सम्बन्धमा थप नकारात्मक प्रभाव पारेको छ । त्यसका विरुद्ध नेपालका केवल संचालकहरूको संस्थाले भारतीय न्यूज च्यानललाई नेपालमा प्रसार गर्न बन्द गरिदिएका छन् । त्यसलाई हामीले सकारात्मक र देशभक्ति पूर्ण कदम मान्दछौँ ।’

Leave a Reply

Your email address will not be published. Required fields are marked *