संघीयता बारेका भ्रमहरु साफ भएका छन्, अब खारेज गर्न ढिला नगरौं : केसी

शेयर यहाँबाट गर्नुहोस्
  •   
  •  
  •  
  •  
  •  
  •  

108 जनाले पढ्नु भयो ।

काठमाडौं । राष्ट्रिय जनमोर्चाले नेपालमा संघीयताबारे सुरुमा केही भ्रमहरु भएपनि अब ती भ्रम साफ भएको जनाएको छ । करिब डेढ दशकको अवधिमा संघीयताका दुष्परिणामहरु देखिएको भन्दै राजमोले देश र जनताको कल्याणका लागि जतिसक्दो छिटो खारेजीमा जोड दिएको छ ।

मंगलबार अध्यक्ष चित्रबहादुर केसीले एक वक्तव्य प्रकाशित गरी देशको अखण्डतामाथि नै आँच पुर्याईरहेको तथा विकास निर्माणका खर्च कटौती गरी संघीयता धान्न परिरहेको भन्दै अब संघीयता खारेज गरी यसको खर्च कोरोना उपचारमा लगाउनुपर्ने बताउनुभएको छ ।

वक्तव्यमा अध्यक्ष केसीले जनस्तरबाटै संघीयताको विरोध हुन थालेकोमा खुशी पनि व्यक्त गर्नुभएको छ । उहाँले मंसिर १४ गतेको कार्यक्रम सफल पार्न सहयोग गर्ने सबैप्रति धन्यवाद पनि दिनुभएको छ ।

यस्तो छ वक्तव्य

राष्ट्रिय जनमोर्चा, केन्द्रीय समितिको आव्हानमा मंसिर १४ गते संघीयताको खारेज गर्न र कोरोना भाइरसको प्रकोपको रोकथाम तथा उपचारमा सरकारले प्रभावकारी काम गर्न नसकेको विषयमा देशव्यापी रुपमा विरोध सभाका कार्यक्रमहरु भव्यरुपमा सम्पन्न भएका छन् । उक्त कार्यक्रमहरु सफल पार्न लागेका पार्टी समिति, पार्टीका साथीहरु र जनसमुदायहरुलाई हार्दिक धन्यवाद छ ।

संघीय शासन प्रणाली नेपालको लागि सही व्यवस्था होइन । सुरुका दिनमा संघीयताबारे भ्रमहरु थिए । आज व्यवहारमै संघीय शासन प्रणाली बेठिक मात्र होइन, यसका कैयन दुष्परिणामहरु देखिएका छन् । पहिलो कुरा त यसले देशको राष्ट्रिय एकता र अखण्डतामाथि गम्भीर खतरा उत्पन्न गरेको छ । दोस्रो कुरा अनावश्यक र अनुचित संघीय शासन प्रणाली चलाउन ठूलो धनराशी खर्च गर्न परिरहेको छ । यो खर्च चलाउन विकाश निर्माणको खर्च कटौती भएको छ र देशका विकास निर्माण कुण्ठित हुन पुगेका छन् । हामीले अहिले नै संघीय प्रणाली खारेज गरेर यसमा हुने गरेको खर्च कोरोना भाइरसको रोकथाम र उपचारमा खर्च गर्न माग गरेका थियौँ । यो डेढ दशकको समयमा संघीय प्रणालीको कुनै आवश्यकता र औचित्य देखिएन । यसले शासन प्रणालीलाई झण्झटिलो पनि बनाएको छ । अब जनस्तरबाटै संघीयताको विरोधमा आवाजहरु उठेका छन् । हामीले यो प्रणाली खारेज गर्न संसदमा संविधान संशोधन प्र्रस्ताव राखेका छौँ । काम गर्ने दौरानमा व्यक्ति वा राजनीतिक दलबाट पनि गल्ती कमजोरी हुन्छन् । त्यस्ता गल्ती कमजोरीलाई ढाकछोप गर्ने होइन कि तिनलाई सुधार गर्नु नै महानता हुन्छ । हामीले जतिसक्यो चाडो संघीयताको खारेज गर्दछौँ, त्यति देश र जनताको कल्याण हुनेछ । त्यसको लागि हामीले देशका सबै राजनीतिक शक्तिहरुलाई हार्दिक आव्हान गर्दछौँ ।

कोरोना भाइरसको प्रकोप नेपालमा बढेर गएको छ । यसमा ठूलो धनराशी खर्च भएको सरकारले बताएको छ । कोरोनाको उपचार खर्चको दायित्वबाट सरकार पन्छिन खोज्दै छ । सरकारले कोरोनाको रोकथाम तथा उपचारमा राम्रो भूमिका खेल्न सकेन । त्यसको लागि छुट्याइएको रकममा समेत भ्रष्टाचार भएका तथ्यहरु बाहिर आएका छन् । त्यसलाई रोक्न र दोषीलाई कारबाही गर्न सरकारले कदम चालेको छैन । भ्रष्टाचारमा देश नै बदनाम भएको छ ।

उपरोक्त दुईवटा विषयहरुमा विरोध प्रकट गर्न हामीले आव्हान गरेका थियौँ । त्यसमा पार्टीका साथीहरु एवं आम जनमुदायहरुको सहयोग र सहभागिता भएर सफलतापूर्वक सम्पन्न गरेकोमा पुनः धन्यवाद ज्ञापन गर्दछौँ ।

मितिः २०७७ मंसिर १६
चित्रबहादुर केसी
अध्यक्ष

Leave a Reply

Your email address will not be published. Required fields are marked *