सरकारको लापरवाही र गलत नीतिको परिणाम जुगलमा जनधनको ठुलो क्षति : राजमो

152 जनाले पढ्नु भयो ।

काठमाडौं । राष्ट्रिय जनमोर्चाले सिन्धुपाल्चोकको जुगल गाउँपालिका लिदीमा सरकारी लापरवाही र गलत नीतिका कारण पहिरोबाट ठुलो जनधनको क्षति भएको जनाएको छ ।

मंगलबार विज्ञप्ति प्रकाशित गरी राजमोले त्यहाँका जनताले वर्षा हुनुभन्दा पहिले नै सुरक्षाको माग गरेका भएपनि उनीहरुको मागप्रति सुनुवाइ नगरेर सरकारले गम्भीर लापरवाही गरेको ठहर गरेको छ ।

राजमोका उपाध्यक्ष एवं प्रवक्ता दुर्गा पौडेलद्वारा जारी विज्ञप्तिमा अन्य कैयौं वस्तीहरुसमेत जोखिमका कारण बस्न लायक नरहेका र सार्नुपर्ने अवस्थामा भएपनि सरकारले ध्यान नदिएको बताउनुभएको छ ।

गत शुक्रबार लिदीमा गएको पहिरोका कारण पुरिएर २४ जनाको ज्यान गएको छ भने १५ जना अझै हराइरहेका छन् ।

यस्तो छ वक्तव्यः

‘१. वर्षा र पहिरोका कारणले सिन्धुपाल्चोकको जुगल गाउँपालिका, लिदीमा पुगेको ठूलो क्षति, मानिसहरुको ठूलो संख्यामा मृत्यु र बेपत्ता भएका समाचाहरुप्रति राष्ट्रिय जनमोर्चाको गम्भीर ध्यानाकर्षित भएको छ । हामीले त्यहाँ मृत्यु भएका सबैप्रति श्रद्धाञ्जली र शोक सन्तप्त परिवारप्रति समवेदना प्रकट गर्दछौँ । पहिरोमा परी घाइतेहरुको समोचित उपचार तथा पहिरोद्वारा पीडित जनतालाई उद्धार र राहतको व्यवस्था गर्नको लागि माग गर्दछौँ ।

२. सामान्य रुपमा हेर्दा सिन्धुपाल्चोकमा व्यापक रुपले भएको पहिरो प्राकृतिक विपत्ति हो । तर त्यो भन्दा बढी त्यहाँ आएको प्राकृतिक विपत्ति मानवीय कमजोरी, सरकारका गलत र गैरजिम्मेवार नीतिहरुको परिणाम हो । त्यहाँका जनताले वर्षा हुनुभन्दा पहिले नै सुरक्षाको माग गरेका थिए । उनीहरुको मागप्रति कुनै सुनुवाइ नहुनु लापरवाहीको पराकाष्ठा हो । त्यसबाहेक अन्यत्रका गाउँहरु पनि स्थानान्तरण गर्नुपर्ने आवश्यकता छ । त्यस दिशामा कुनै ध्यान दिइएको छैन । त्यसकालागि हामीले सरकारको गम्भीर आलोचना गर्न चाहान्छौँ । त्यहाँ पहिरोको समस्याको नियन्त्रणको लागि सरकारसित प्रभावशाली प्रकारका तात्कालीन र दिर्घकालीन प्रकारका कदमहरु उठाउनका लागि जोरदार माग गर्दछौँ ।

३. २०७२ सालको भुकम्पपछि जोखिम स्थानहरुमा परेका बस्तीहरु स्थानान्तरण वाआवश्यक संरक्षणको लागि कैयौँ तिरबाट आवाज उठ्ने गरेको छ । सरकारी वा गैरसरकारी निकायहरुले भूगर्भीय अध्ययन गरेर विभिन्न जिल्लाका कैयौँ बस्तीहरु जोखिममा भएको र तिनीहरुको सुरक्षित स्थानहरुमा स्थानान्तर गर्नुपर्ने वा संरक्षण गर्नुपर्ने आवश्यकतामा जोड दिंदै आएका थिए । तर सरकारले त्यसप्रति गम्भीर उपेक्षाको नीति अपनाउँदै आएको छ । त्यसले गर्दा नै पहिरोले कैयौँ बस्तीहरुलाई बगाएर लग्यो र ठूलो जनधनको क्षति भयो । त्यो अवस्थामा यो स्पष्ट छ कि त्यसप्रकारको क्षतिका लागि सरकारको उपेक्षा र गैरजिम्मेवार दृष्टिकोण नै जिम्मेवार छ ।

४. बाढीपहिरो एउटा गम्भीर समस्या हो । त्यसकालागि केही करोड रुपैयाँ बजेटमा छुट्याइएको छ । तर त्यसको पनि सदुपयोग भैरहेको छैन । अहिले बाढी पहिरोको समस्याको गम्भीरतामाथि ध्यान दिंदा त्यसको समाधानकालागि विस्तृत योजना बनाउनुपर्ने ,त्यसका लागि ठूलो बजेट छुट्याउनुपर्ने र त्यसबारे ठोस रुपले काम गर्नुपर्ने आवश्यकता छ । भूगर्भीय रुपले सर्वेक्षण गरेर आवश्यकताअनुसार स्थानान्तरण, पुनर्बास वा संरक्षणको लागि प्रभावशाली कदम उठाउनका लागि हामीले सरकारको गम्भीर ध्यानआकर्षित गर्न चाहान्छौँ । त्यसबारे सरकारमाथि व्यापक दवाव सिर्जना गर्न सबै न्यायप्रेमी जनता, राजनीतिकदल, संघ सस्थाहरु र व्यक्तित्वसित पनि अपिल गर्दछौँ ।

५. कञ्चनपुरकी बालिका निर्मला पन्तको बलात्कारपछि हत्या भएको दुई वर्ष वितिसक्दा पनि सरकारले अपराधी पत्ता लगाउन सकेको छैन । यसले अपराधीको मनोबल झनै बढेको छ । अन्यत्र पनि बलात्कार र हत्याका घटना भइरहेका छन् । निर्मला पन्तका बलात्कारी र हत्यारा पत्ता लगाई कडा भन्दा कडा कारवाही गर्न, देशमा बलात्कार तथा हत्या हुन नदिन पूर्व सावधानीका उपायहरु अपनाउन र जनताको सुरक्षा गर्न माग गर्दछौं ।’

Leave a Reply

Your email address will not be published. Required fields are marked *