हुम्ला लिमी प्रकरणबारे सत्य तथ्य पत्ता लगाउ : मसाल

  •   
  •  
  •  
  •  
  •  
  •  

228 जनाले पढ्नु भयो ।

काठमाडौँ । नेकपा (मसाल) ले चीनसँग जोडिएको हुम्लाको लिमी उपत्यकामा सीमा अतिक्रमण भएको समाचारबारे सत्य तथ्य सार्वजनिक गर्न सरकारसित माग गरेको छ ।

परराष्ट्र मन्त्री प्रदीप ज्ञवालीले असोज ७ गते ‘स्थलगत अध्ययनमा गएको टोलीले सत्य तथ्य ल्याउने’ बताएसँगै पार्टीको सो अवधारणा सार्वजनिक भएको हो ।

पार्टी प्रवक्ता रामप्रकाश पुरीको हस्ताक्षरमा २०७७ असोज ८ गते जारी प्रेसवक्तव्यमा सो धारणा सार्वजनिक गरिएको छ ।

सिमानामा कुनै पनि छिमेकीले गर्ने क्रियाकलाप शङ्कास्पद र विवादास्पद देखिएमा त्यसबाट नेपाली भूमिको स्वतन्त्रता गम्भीर बन्न जाने दृष्टिकोण व्यक्त भएको सो प्रेसवक्तव्यमा अगाडि भनिएको छ–

“हुम्लाको लिमी उपत्यकामा चीनले नेपाली भूमिमा भवनहरू निर्माण गरेको समाचार सार्वजनिक भएका छन् र त्यो विषयलाई नेपाल सरकारका परराष्ट्र मन्त्रीले चीनका तर्फबाट नेपाली भूमि नमिचिएको भनेर बताएका छन् । तर त्यसका साथै स्थलगत अध्ययनका लागि गएको टोलीले थप तथ्य ल्याउने पनि बताएका छन् । त्यसरी विचार गर्दा परराष्ट्र मन्त्रीको भनाइ अपूर्ण अवस्थामा रहेको छ र चीनका तर्फबाट नेपाली भूमि नमिचिएको कुरा प्रमाणित भइसकेको छैन ।

नेपालको सीमावरिपरि विशाल दुई छिमेकी राष्ट्रहरूको सीमाक्षेत्र पर्दछ । ती सीमाक्षेत्रमा कुनै छिमेकी मुलुकले गर्ने क्रियाकलाप शङ्कास्पद र विवादास्पद देखिएमा नेपालको भूमिको स्वतन्त्रताको विषय गम्भीर बन्न जान्छ । सीमाक्षेत्रका नेपालको भूमिबारे सरकारले स्पष्ट भएर जनतालाई विश्वास उपलब्ध बनाउने प्रकारले आफ्नो दृष्टिकोण सार्वजनिक गर्नुपर्दछ । त्यसैले हुम्लाको लिमी उपत्यकामा चीनबाट भएको अतिक्रमणबारे सत्य तथ्य पत्ता लगाएर सरकारले देशको सार्वभौमिकता, स्वतन्त्रता र अखण्डताको रक्षाको गर्नुपर्ने आवश्यकतामा हाम्रो पार्टीले जोड दिन चाहन्छ ।”

Leave a Reply

Your email address will not be published. Required fields are marked *