आज भाद्र ११ (तदानुसार अगस्त २७) अर्थात, नेपाली एकता मासिकका सह सम्पादक तथा तात्तकालिन अखिल भारत नेपाली एकता समाजका शोभाखर धनञ्जय (सरोज शर्मा)ले सहादत प्राप्त गरेको दिन । आज भन्दा ३४ बर्ष अगाडि २०४३ साल भाद्र ११ गते अगस्त २७ तारिक १९८६ मा वेलारोडमा नेपालीहरुको एउटा भेलामा वहाँ पत्रिका विक्रिका लागि जानुभएको थियो । करिब ७ बजे राती वहाँ साथीहरु सित विदा हुनुभएको थियो । २९ तारिकसम्म पनि कार्यालयमा नपुगेपछि वहाँको खोज तलास शुरु भएको थियो । वहाँ गाएब भएको रिपोर्ट सिभिल लाईन पुलिस ठाना (दिल्ली)मा लेखाइएको थियो ।
सबै प्रमुख अस्पताल पुलिस ठानामा वहाँलाई खोजि गरिएको थियो । दिल्लीबाट प्रकाशित हुने अखबारमा पनि हराएको सुचना प्रकाशित गरिएको थियो, तर केही पत्ता लागेन । अन्तमा ११ सितम्बर १९८६ का दिन नव भारत टाइम्समा प्रकाशित पुलिस समाचारका आधारमा खोज्दा वहाँको २७ अगस्तमा नै दुर्घटना भएर पहिले मूलचन्द अस्पताल र त्यसपछि जय प्रकाश नारायण अस्पतालमा भर्ना गरिएको र ५ सितम्बरमा नै सोही अस्पतालमा मृत्यु भएको जानकारी संगठनलाई प्राप्त भएको थियो । साथै १० सितम्बर १९८६ का दिन दाहसंस्कार गरिएको जानकारी समेत प्राप्त भएको थियो । वहाँको दूर्घटनामा निधन भएको थियो वा हत्या भएको थियो, त्यसको सत्यतथ्य आजसम्म रहस्य नै रहेको छ ।
वहाँ सरोज शर्मा उपनामले हाम्रो बिचमा परिचित हुनुहुन्थ्यो, तर वहाँको वास्तविक नाम शोभाखर धनन्जय भुसाल हो । १२ मईको नयाँ दिल्लीको प्रदर्शनका सिलसिलामा वहाँ गिरफ्तार भएर जेलमा पनि बस्नु भएको थियो । वहाँको घर अर्घाखाँची जिल्लामा पर्दछ । वहाँले तात्कालिन अखिल भारत नेपाली एकता समाजको द्वितीय सम्मेलन पछि एकता समाजको केन्द्रीय कार्यालय इन्चार्ज र नेपाली एकता मासिकको सहसम्पादकको रुपमा कार्यरत हुनुहुन्थ्यो । वहाँ काठमाडौंबाट प्रकाशित हुने हाँक साप्ताहिक पत्रिकाको सम्पादक र प्रकाशक हुनुहुन्थ्यो । सरोज शर्मा अत्यन्त कर्तव्यनिष्ठ, मिलनसार, नम्र र इमान्दार नेता हुनुहुन्थ्यो । वहाँले आफ्ना परिवारमा समेत कर्तव्यनिष्ठ, मिलनसार, नम्र र इमान्दारीताको बारेमा राम्रोसँग सिकाउनु भएको थियो । त्यसैले नै वहाँको निधन पछि वहाँको नाम रहेको हाँक साप्ताहिक पार्टीलाई बुझाउनु भएको थियो । तर दुःखसाथ भन्नु पर्दा आज त्यो पत्रिका पार्टीसँग छैन । वहाँको त्यो नाशोलाई आज केही व्यक्तिगत महत्वकांक्षा बोकेका व्यक्तिले निजी सम्पत्तीको रुपमा परिणत गरेका छन् ।
तर पनि हामीलाई विश्वास छ, का. सरोज शर्माले जुन विश्वास र उदेश्यका साथ काम गर्नुभएको थियो त्यो विश्वासलाई ढल्न दिने छैनौं । भारत प्रवासमा त्यो अभिभारा नेपाली एकता डटकमले लिएको छ । उहाँले देखाएको इन्मादारी, निष्ठा र अविचलित रुपमा संगठनमा काम गर्नु पर्ने जुन मार्ग देखाउनु भएको छ, वहाँले देखाउनु भएको मार्गमा अबिचलित रुपमा अगाडि बढिरहने प्रतिबद्धता व्यक्त गर्दछौं । शहिद सरोज शर्माको ३५ औं स्मृति दिवसको यस अवसरमा उहाँप्रति भावपुर्ण श्रद्धासुमन अर्पण गर्दै शोकसन्तप्त परिवारजनमा हार्दिक समबेदना ।
नेपाली समाचार–साप्ताहिक
nepaliekta.com