काठमाडौं । राष्ट्रिय जनमोर्चाका अध्यक्ष चित्रबहादुर केसीले संसद र लोकतन्त्र बचाउन पाँचदलीय गठबन्धन बनेको बताउनुभएको छ ।

शुक्रबार काठमाडौंमा पाँचदलीय गठबन्धनले आयोजना गरेको चुनावी सभामा बोल्दै अध्यक्ष केसीले संसद बचाउने कुरामा गठबन्धनभित्र एकमत भएकाले पाँच दल एक ठाउँमा उभिएका पनि बताउनुभयो ।

‘पाँच दलभित्र सबैको एक मत छैन तर संसद बचाउने कुरामा गठबन्धनभित्र एकमत छ त्यही भएर हामी एक ठाउँमा आएका हौँ,’ केसीले भन्नुभयो ।

उहाँले नेकपा एमालेप्रति इंगित गर्दै एकाधिकार सत्ता चलाएकाहरुले गठबन्धनभित्र प्रहार गरिरहेको पनि आरोप लगाउनुभयो ।

हिजो भरतपुरमा आयोजित सभामा केसी सहभागी हुनुभएको थिएन । भरतपुरको सभामा प्रचण्डले सम्बोधन गर्ने क्रममा ‘जय नेपाल’ शब्द प्रयोग गर्नुभएको थियो ।

कार्यक्रममा केसीले कसैलाई खुशी पार्न आफूले जय नेपाल र लालसलाम नभन्ने पनि स्पष्ट पार्नुभयो । सबैलाई एकमुस्ट अभिनन्दन गर्दै केसीले यसअघि कुनै सभामा आफू सहभागी नभएको सम्बोधनको क्रममा जानकारी गराउनुभयो।
‘…सम्पूर्ण मित्रहरूलाई म राष्ट्रिय जनमोर्चाको तर्फबाट अभिनन्दन गर्न चाहन्छु। अभिनन्दन भनेपछि सबै चल्छ सबैलाई यही हो,’ उनले अघि भने, ‘कसैलाई खुसी पार्न जय नेपाल र कसैलाई खुसी पार्न लाल सलाम होइन, अभिनन्दन पाँचै दलका सबैलाई।

केसीले काठमाडौँ महानगरपालिकाबाट जाने सन्देशले देशभर असर पर्ने जिकिर गर्नुभयो। महानगरपालिकाको सन्देशले देशभर असर पर्ने केसीको भनाई छ ।

‘काठमाडौँ मुलुकको महत्वपूर्ण ठाउँ हो। महानगरपालिकाबाट जाने सन्देश देशभर र अन्तराष्ट्रिय स्तरमा असर पर्छ,’ अध्यक्ष केसीले भन्नुभयो, ‘मेयर महत्वपूर्ण ओहोदा हो। हामी सबैलाई विश्वास छ यो चुनावमा सिर्जना सिंहले विजय प्राप्त गर्नुहुनेछ। महानगरको नेतृत्व गर्नुहुने छ।’

केसीले गठबन्धनभन्दा नेपालमा प्रतिगमन बलियो रहेको जिकीर गर्नुभयो । संसद विघटन गर्ने प्रतिगमन शक्ति गठबन्धनभन्दा शक्तिशाली रहेको उहाँको भनाई थियो । ‘गठबन्धनभन्दा प्रतिगमन बलियो छ। प्रतिगमन एक्लै छैन नेपालमा’ केसीले भन्नुभयो ।

छ महानगरलगायत अन्यत्र जनमोर्चाले इमान्दारीपूर्वक गठबन्धनलाई सहयोग गर्ने भन्दै उहाँले चन्द्रागिरि नगरपालिकामा जनमोर्चाले उपमेयर उठाएकोले सहयोग गर्न आग्रह गर्नुभयो ।