काठमाडौं । राष्ट्रिय जनमोर्चाका अध्यक्ष चित्रबहादुर केसीले एमसीसी सम्बन्धमा टुंगो लगाउन बनेको कार्यदलको औचित्य नभएको बताउनुभएको छ । सो कार्यदल जनता भुलाउने र झुक्याउने षडयन्त्र मात्रै भएको उहाँको भनाई छ ।

सोमबार बिहान नेपाली रेडियो नेटवर्क (एनआरएन) को कार्यक्रम नेपाली बहसमा अन्तर्वार्ता दिँदै अध्यक्ष केसीले एमसीसी खारेज गर्नुको कुनै विकल्प नभएको स्पष्ट पार्नुभएको छ ।

आइतबार बसेको सर्वदलीय बैठकले एमसीसीबारे टुंगो लगाउन तीन सदस्यीय कार्यदल बनाएको छ । कार्यदलमा नेकपा (एकीकृत समाजवादी) का अध्यक्ष झलनाथ खनाल, नेकपा (माओवादी केन्द्र) का नेता नारायणकाजी श्रेष्ठ र सञ्चार तथा सूचना प्रविधीमन्त्री ज्ञानेन्द्रबहादुर कार्की छन् ।

सो कार्यदललाई ‘जनता झुक्याउने षडयन्त्र’ को संज्ञा दिँदै अध्यक्ष केसीले एमसीसीका मतियारलाई कारबाही गर्नुपर्ने बताउनुभयो ।

‘कार्यदल जनतालाई झुक्याउने र भुल्याउने षडयन्त्र हो । यो नेपाल र नेपालीको हितमा छैन । अब एमसीसीका मतियारलाई कारबाही गर्नुपर्छ । अनेक नाटक गरेर अमेरिकी साम्राज्यवादको पासो नेपाली जनताको घाँटीमा बेर्न पाइँदैन’ केसीले भन्नुभयो, ‘नेपाललाई एमसीसी बोकाएर सत्ताको दुनो सोझ्याएको जनताले थाहा पाइसकेका छन् । अब अमेरिकी साम्राज्यवादका गोठालाहरुको हार हुन्छ ।’

अध्यक्ष केसीले ५ दलीय गठबन्धनमा सामेल हुनु अमेरिकी साम्राज्यवादको एजेन्ट भएर देश बेच्नु नभएको स्पष्ट पार्नुभयो।

केसीले भन्नुभयो, ‘यहाँ आफू सत्ता र शक्तिमा बस्न अमेरिकी साम्राज्यवादको दलाली गरिरहेका छन् । तिनलाई नेपाली जनताले चिनिसकेका छन् । राजमो देशभक्त शक्ति हो, एमसीसीमा मद्दत गर्ने राष्ट्रघाती हो । ५ दलीय गठबन्धनमा सामेल हुनु भनेको अमेरिकी साम्राज्यवादका एजेन्ट भएर देश बेच्नु हो र ? राजमोले सार्वभौमसत्ताको सौदाबाजी गरेर सत्ता र शक्तिमा रजाइँ गर्दैन ।’

उहाँले एमसीसी पास गर्ने षड्यन्त्र भए सडकदेखि संसद्सम्म राजमो विरोधमा उत्रने चेतावनी पनि दिनुभयो। कर्णाली, महाकाली भारतलाई बुझाएर नेपालको उन्नती हुन्छ भननेहरुले नै एमसीसीको आशीर्वाद लिन खोजेको केसीको आरोप थियो ।

‘यहाँका नेताले माथिल्लो कर्णाली, महाकाली बुझाए, श्रम शक्ति अरबको खाडीमा पठाएका छन् । के त्यस्तो गर्ने लाइसेन्स नेपाली जनताले दिएका थिए?’ अध्यक्ष केसीले प्रश्न गर्नुभयो, ‘एमसीसी पास गर्न अहिले शेरबहादुर मात्र होइनन्, खड्गप्रसाद ओलीले पनि अमेरिकी साम्राज्यवादको आशीर्वाद लिन खोजेका थिए । प्रचण्ड र माधव नेपाल पनि नजिकै चुनाव नभएको भए पास गर्न तयार हुन्थे । अहिले अमेरिकालाई देखाउन नाटक गर्न खोजिरहेका छन् ।’