पोखरा । राष्ट्रिय जनमोर्चाका अध्यक्ष चित्रबहादुर केसीले एम.सी.सी. नेपालका लागि गल्पासो हुने बताएका छन् ।
२०७८ फागुन ६ गते शुक्रवार राजमो गण्डकी प्रदेश सम्मेलन उद्घाटन गर्दै अध्यक्ष केसीले नेपाली नेताहरूले देश र जनताको भन्दा विदेशीकोे चित्त बुझाउने राजनीति गरेको आरोप लगाउनुभयो ।
महाकालीभन्दा अर्को ठुलो राष्ट्रघात नेपाली जनताले नचाहेको भन्दै एम.सी.सी. को खारेजी नै वर्तमान आन्दोलनको मुख्य उद्देश्य रहेको उल्लेख गर्नुभयो ।
कार्यक्रममा अध्यक्ष केसीले नेपालमा सङ्घीयता जबरजस्ती लागु गरेको भन्दै त्यसको दुष्परिणाम जनताले धेरै समय रहन नदिने विश्वास व्यक्त गर्नुभयो ।
समसामयिक राजनीतिक परिस्थितिबारे बोल्दै अध्यक्ष केसीले राष्ट्रिय जनमोर्चाले एम.सी.सी. खारेज गर्ने अडानका कारण गठबन्धनको बैठकमा बोलाउन छाडेकोसमेत बताउनुभयो ।
कार्यक्रममा राजमो केन्द्रीय सदस्य एवम् जिल्ला समन्वय समिति बागलुङका प्रमुख राजेन्द्र ढुङ्गानाले राष्ट्रिय जनमोर्चाको राजनीतिक भविस्य उज्ज्वल रहेको भन्दै प्रतिक्रियावादीहरूको भ्रममा नपर्न अपिल गर्नुभयो ।
सो अवसरमा अखिल नेपाल बुद्धिजीवी सङ्घका केन्द्रीय सदस्य काजीगाउँले श्रेष्ठ, अखिल नेपाल महिला सङ्घकी केन्द्रीय उपाध्यक्ष लक्ष्मी बास्कोटा, अखिल (छैठौं) का केन्द्रीय उपाध्यक्ष गणेश अधिकारीलगायतले शुभकामना मन्तव्य राख्नुभएको थियो ।
कार्यक्रम प्रदेश अध्यक्ष शङ्कर बरालको अध्यक्षता, सचिव बेदिलाल सापकोेटाको स्वागत मन्तव्य र राजमो कास्कीका अध्यक्ष रविमोहन ढकालको सञ्चालनमा सम्पन्न भएको हो ।
अध्यक्षमा बराल
राष्ट्रिय जनमोर्चा गण्डकी प्रदेश समितिको अध्यक्षमा शङ्कर बराल (कास्की) निर्वाचित हुनुभएको छ । समितिको उपाध्यक्षमा धर्मबहादुर कुँवर (बागलुङ), सचिवमा बेदीलाल सापकोटा (बागलुङ), सहसचिवमा खिमविक्रम शाही (बागलुङ) र कोषाध्यक्षमा रविमोहन ढकाल (कास्की) रहनुभएको छ ।
त्यस्तै, सदस्यहरूमा अमर थापा (बागलुङ), गौरिश्वर पाण्डे (बागलुङ), राजेन्द्र ढुङ्गाना (बागलुङ), पियारी थापा (बागलुङ), दीपक पाण्डे (नवलपुर), भागिरथ भट्टराई (नवलपुर), दिलबहादुर दर्जी (बागलुङ), लीलादेव शर्मा (बागलुङ), चन्द्रा परियार (तनहुँ), तिलक थापा (बागलुङ), लक्ष्मी विक (नवलपुर), छवि विक (म्याग्दी), लक्ष्मी बास्कोटा (बागलुङ), कृष्ण सापकोटा (नवलपुर), विकाराम चौधरी (नवलपुर), गोविन्द पौडेल (पर्वत) र गणेश अधिकारी (कास्की) रहनुभएको छ ।
