हैदराबाद । मूल प्रवाह अखिल भारत नेपाली एकता समाजको हैदरनगरमा टोल समिति पुनर्गठन भएको छ ।
उत्तर हैदरावाद नगर समितिद्वारा सञ्चालित हैदरनगर एरिया अन्तर्गत पर्ने बालानगर टोल समितिको दोस्रो टोल भेला सम्पन्न भएको हो ।
मध्यदक्षिण क्षेत्रीय कोषाध्यक्ष घनश्याम शर्माले सम्बोधन गर्दै भारतमा रहेका नेपालीहरुको एकमात्र अभिभावकीय संगठन मूल प्रवाह नै रहेको बताउनु भयो । उहाँले एकता समाजले हरेक प्रकारका समस्याबारे छलफल गर्दै समाधन गरेको बताउनु भयो ।
नेता शर्माले भन्नु भयो–‘अहिले मूल प्रवाहको नाममा भ्रम फैलाउँदै कतिपय फुटपरस्त तत्वहरुले आफू नै मूल प्रवाह भनी हिँडिरहेका थिए । जब मूल प्रवाहको ऐतिहासिक आठौं अखिल भारत सम्मेलन भब्य र उत्साहजनक रुपमा सम्पन्न भयो, उनीहरुलाई खपी नसक्नु भै कुन्ठा पोख्दै र हतासिँदै गरेको अवस्थामा छन् । अब उनीहरु धेरैदिन रहन नसक्ने र एउटा बाटो समाउनु पर्ने अवस्था रहेको छ ।’
त्यस्तै, उत्तर नगर समितिका सचिव जीवनाथ शर्मा, हैदरनगर एरियाका रामचन्द्र आचार्य, अम्बिका अधिकारी, राम शर्मा र विद्यार्थी विभागकी अस्मिता आचार्यले भेला सफलताको शुभकामना दिनुभएको थियो ।
टोल भेलाले चुनेको प्यानल रामचन्द्र आचार्यले प्रस्तुत गर्नुभएको थियो। जसमा अध्यक्ष सीता आचार्य ,उपाध्यक्ष अम्बिका कार्की, सचिव माया थापा, सहसचिव माया भुजेल र कोषाध्यक्षमा शर्मिला थापा चयन हुनुभएको छ । सदस्यहरुमा अनु थापा, कमला दास, यसोदा न्यौपाने र अर्पना भण्डारी रहनु भएको छ । सीता आचार्यको अध्यक्षता, माया थापाको सञ्चालन तथा यशोदा न्यौपानेले स्वागत गर्नुभयो ।
