काठमाडौं । राष्ट्रिय जनमोर्चाको असहमतिका कारण पाँचदलीय गठबन्धनको संयुक्त अपील प्रकाशन नहुने भएको छ ।
सत्ता गठबन्धनले अपीलमा संघीयतालाई उपलब्धिका रुपमा उल्लेख गर्ने भएपछि राजमोले असहमति जनाएको हो । अब राजमोबाहेक सत्ताधारी दलहरूले मात्रै अपील प्रकाशन गर्ने राष्ट्रिय जनमोर्चाका महासचिव मनोज भट्टले जानकारी दिनुभयो ।
‘सत्ता गठबन्धनले संघीयतालाई अपीलमा राख्न जोड गरेपछि हामीले असहमति प्रकट गरेका छौँ’ भट्टले भन्नुभयो, ‘त्यसकारण अब तीन दलले मात्रै अपील प्रकाशन गर्ने छन्, हाम्रो त्यसमा हस्ताक्षर हुँदैन ।’
पाँचदलीय गठबन्धनले असोज २७ गते बैठक बसी संयुक्त अपील प्रकाशन गर्ने निर्णय गर्नुका साथै अपीलको ड्राफ्ट तयार गर्न चार दलबाट एक एक जना सदस्य रहेको कमिटी गठन गरेको थियो। जसमा राजमोबाट सचिव हिमलाल पुरीलाई राखिएको थियो ।
राजमोले संघीयताविरुद्ध निरन्तर संघर्षरत गर्दै आइरहेको छ भने नागरिकता विधेयक, एमसीसी, एसपीपी जस्ता विषयमा सत्ताधारी दलसँगसमेत संघर्ष गरिरहेको छ । तर, प्रतिगमनको खतरा उत्पन्न हुन नदिन सत्ताधारी दलसँग गठबन्धन गर्नुपर्ने अवस्था रहेको स्पष्ट पारेको छ ।
