खुम रायमाझी,

कुवेत । कुवेतमा बिरामी परी अस्पतालमा भर्ना भएर अलपत्र अवस्थामा भेटिएका प्युठानको स्वर्गद्वारीस्थित सारीका नेमबहादुर घर्तीको सफल उद्धारपछि नेपाल फर्किएका छन् ।

सन २०१६ मा कुवेत पुगेका घर्ती विभिन्न बाध्यताले गर्दा आफू कार्यरत कम्पनीबाट एक वर्षभित्रै सन् २०१७ देखि भागेर अवैधानिक रूपमा काम गर्दै आएका थिए । समय बित्दै जाँदा आठ वर्षपछि उनले नेपाल फर्कने निधोसहित कुवेतस्थित राजदूतावासबाट अनुमति लिएर सेल्टरमा पुगेका थिए तर त्यहाँ गएको एक दुई दिनभित्रै उनी बिरामी परे । त्यस क्रममा बेहोस भएपछि यही अप्रिल १४, २०२४ का दिन एम्बुलेन्समार्फत अस्पताल भर्ना भएका थिए ।

अस्पतालमा जाँच गर्दा सुरुमा कोरोना पोजेटिभ देखिएता पनि क्रमशः जाँच गर्दै जाँदा उनको एउटा मिर्गौलाले काम गर्न छोडेको पत्ता लागेको थियो । त्यसपछि डाक्टरहरूले मिर्गौलासम्बन्धी उपचार सुरु गरेपछि उनको अवस्था सामान्य हुँदै गएको थियो । मिर्गौला प्रत्यारोपण वा कुनै अप्रेसन गर्न कुवेतमा सहज नभएको कारण उनलाई डाक्टरले डिस्चार्ज गरेर नेपाल जान सल्लाह दिएका थिए ।

सबै कुरा तयारी भएपछि अस्पतालको लेखा कार्यालयबाट लगभग नौ लाख नेपाली रुपैयाँको बिल आउँदा उनी छाँगाबाट खसे जस्तै भए । त्यो पीडा घरपरिवारलाई सुनाएपछि पीडितका परिवारले स्वर्गद्वारी नगरपालिका उपप्रमुख मीनराज राना र राष्ट्रिय जनमोर्चाका नेता बोमबहादुर खत्रीसित बिरामीको उद्वार गरिदिन अनुरोध गरे । त्यसपछि राजमोका प्रवास इन्चार्ज आनन्द शर्माले कुवेत नेपाली एकता समाजका महासचिव खुम रायमाझीलाई विवरणसहित जानकारी गराएसँगै एकता समाजको टोली अस्पताल पुग्दा उनी अलपत्र अवस्था भेटिएका थिए ।

सबै कुरा बुझ्दा बिरामी निकै अप्ठ्यारो अवस्थामा रहेको पाइएपछि रायमाझीले पीडितको तर्फबाट निवेदन तयार गरी नेपाली राजदूतावास कुवेतका प्रथम सचिव प्रेमराज गौतममार्फत राजदूतावासमा बुझाएसँगै उनको उद्धार प्रकिया अगाडि बढेको थियो ।

कुवेतका लागि राजदूत घनश्याम लम्सालको निर्देशन,प्रथम सचिव गौतमको सहजिकरणमा राजदुतावासका प्रतिनिधि सिराज अहमदको निरन्तर प्रयासबाट बिरामीको उद्धारकार्य सफल भएको हो ।

राजदूतावासको पहलमा उनको सम्पूर्ण उपचार खर्च नेपाली रुपैयाँ १४ लाख ६१ हजार छ सय माफी गराई उनी मे ३०, २०२४ का दिन नेपाल उडेका थिए । नेपाल फर्किन सक्छु भन्ने आशा मारेका घर्ती कुवेतको विमानस्थलमा निकै नै भावुक बन्दै कुवेत एकता समाज र राजदूतावासले गरेको सहयोग जीवनभरि नभुल्ने बताए ।

कुवेत एकता समाजका महासचिव रायामाझीका अनुसार अहिले उनि काठमाडौँको वीर अस्पतालमा उपचाराधीन छन् । परिवारले उनको पुनर्जीवनका लागि आर्थिक सहायताको अपिल गरिरहेको जानकारी दिनुभयो । साथै निजको आर्थिक अवस्था निकै कमजोर रहेको हुँदा उनको उपचारका लागि सबैले सक्दो सहयोग गर्न पनि सबैमा अनुरोध गर्नुभयो । यस उद्धारकार्यमा प्युठान स्वर्गद्वारीका स्थानीय नेता गङ्गाराम बिसीले सम्पर्क गर्न/गराउन भूमिका खेल्नुभएको थियो भने टिकटका लागि प्युठानकै मुक्तिराम केसीले ऋणस्वरूप उपलब्ध गराउनुभएको छ ।
कुवेत एकता समाजले अक्टोबर २०२३ देखि यता विभिन्न समस्यामा परेका नेपाली घरेलु महिला कामदारहरू दाङ, कपिलवस्तु, रुपन्देही, झापा, स्याङजा र नवलपुर, रोल्पा गरी सात जनालाई उद्धार गरेर राजदूतावासमार्फत नेपाल पठाएको थियो ।