* हेम बिजी
घाम डुबेको आधा समय
र घाम उदाउन
बाँकी आधा समय
ए मध्यरात
यो निस्पट्ट अन्धकार रातमा
तैँले
सिंहदरबारको कुर्ची बदल्छस् किन
सिंहदरबारको सत्ता पल्टाउँछस् किन
निदाइरहेको बेला सपनामा जनताहरू
र जाग्राम राखेर नेताहरू
भोली
मध्यान्ह नआउँदै
तैँले
ए मध्यरात
कुर्चीको खेल खेल्छस् किन
सत्ताको झेल खेल्छस् किन
मैले सुनेको छु
ए मध्यरात
तैँले
हतार हतारमा
कुर्ची बदल्न सम्झौता गरिस् रे मध्यरातमै
सत्ता फेर्न हस्ताक्षर गरिस् रे मध्यरातमै
मेरो
मध्यरातलाई प्रश्न छ
तैँले
मध्यरातमा सम्झौता गर्नेले
मध्यरातमा भूकम्पमा घरहरू ढल्दा
कहिल्यै
झुप्राहरू बनाउन मध्यरातमा
सम्झौता गरिनस् किन
तैँले
मध्यरातमा हस्ताक्षर गर्नेले
मध्यरातमा बालिका बलात्कृत हुँदा
कहिल्यै
बालिकालाई न्याय दिन
मध्यरातमा हस्ताक्षर गरिनस् किन
तैँले
मध्यरातमा सहमति गर्नेले
मध्यरातमा जङ्गे पिलर सर्दा
कहिल्यै
मध्यरातमा सिमाना रक्षा गर्न
सहमति गरिनस् किन
त्यसैले
घाम डुबेको आधा समय
र घाम उदाउन
बाँकी आधा समय
ए मध्यरात
निदाइरहेको बेला सपनामा जनताहरू
र जाग्राम राखेर नेताहरू
तैँले
कुची स्वार्थको लागि मात्र मध्यरातमा
सम्झौता नगर
सत्ता लिप्साको लागि मात्र मध्यरातमा
हस्ताक्षर नगर
किनकि
सधैँ सधैँ जसरी
निदाई रहँदैनन् जनताहरू मध्यरातमा
अब
मध्यरातमा पनि जनताहरू जाग्न सक्छन्
मध्यरातमा पनि जनताहरू उठ्न सक्छन् ।।
