दाङ । नेकपा (मसाल) का महामन्त्री मोहनविक्रम सिंहले सङ्घीयता खारेज गर्दा स्वास्थ्य र शिक्षालाई व्यवस्थित गर्न सकिने धारणा राख्नुभएको छ ।
२०८१ असोज १२ गते सोमबार प्रगतिशील पत्रकार सङ्घ दाङद्वारा आयोजित पत्रकार सम्मेलनमा धारणा राख्दै उहाँले यस्तो बताउनुभएको हो ।
घोराहीस्थित नेपाल पत्रकार महासङ्घको जिल्ला कार्यालयमा आयोजित पत्रकार सम्मेलनलाई सम्बोधन गर्दै उहाँले भन्नुभयो– ‘सङ्घीयता खारेज गर्ने हो भने त्यसबाट बचेको खर्चले स्वास्थ्य र शिक्षालाई व्यवस्थित गर्न सकिन्छ ।’
उहाँले सङ्घीयता नेपालको लागि बोझ भइसकेको धारणा व्यक्त गर्नुभयो ।
‘अहिले सत्तारूढ दलहरूले संविधान संशोधन गर्ने कुरा गरिरहेका छन् । संविधान संशोधन नै गर्नु हुन्न भन्ने हाम्रो भनाइ होइन’ उहाँले अगाडि भन्नुभयो– ‘संविधान नै संशोधन गर्ने हो भने सङ्घीयतालाई खारेज गर्ने गरी संविधान संशोधन गरौँ । त्यसबाट बचेको बजेटले स्वास्थ्य र शिक्षा क्षेत्रलाई व्यवस्थित गर्न सकिन्छ ।’
प्रतिगमनको खतरा गम्भीर
महामन्त्री सिंहले प्रतिगमनको खतरा अहिले पनि गम्भीर रहेको बताउनुभयो ।
‘एमालेले आफूले चाहेका बेला संसद् विघटन गर्न पाउनुपर्छ भन्ने धारणा राख्दछ । काङ्ग्रेसभित्र धर्मनिरपेक्षता विरुद्ध हिन्दु राष्ट्रको पक्षमा बलियो जनमत छ’ उहाँले भन्नुभयो– ‘यस्तो अवस्थामा देशमा शिशु अवस्थामा रहेको गणतन्त्र र धर्मनिरपेक्षता खतरामा पर्न सक्दछ ।’
उहाँले अहिलेको सत्तारूढ पक्षबाट देशमा गणतन्त्र र धर्मनिरपेक्षता खतरामा भएकाले त्यसका विरुद्ध नेपाली जनताले उच्च सतर्कता अपनाउन आग्रह गर्नुभयो ।
साम्राज्यवादी खतरा पति त्यत्तिकै
मसालमा महामन्त्री सिंहले नेपालमा भारतीय साम्राज्यवाद र अमेरिकी साम्राज्यवादको खतरा गम्भीर बन्दै गएको बताउनुभयो ।
‘भारतले अन्ततः नेपाललाई आफूमा गाम्न चाहान्छ । अहिलेको गणतन्त्र र धर्मनिरपेक्षता उसलाई मन परेको छैन । नागरिकताबारे उसको चासोबारे सबैलाई थाहा छ । सीमा अतिक्रमण सबैलाई थाहा भएको विषय हो’ उहाँले भन्नुभयो– ‘उता, अमेरिकी साम्राज्यवादले नेपाललाई चीनको विरुद्ध क्रिडास्थल बनाउन चाहेको छ । सोही रणनीतिअन्तर्गत एमसिसी पास भइसक्यो । एसपिपी पास गराउने प्रयासमा छ ।’
उहाँले अमेरिकाले पुराना पार्टीमाथि पूरै विश्वास नगरेर राष्ट्रिय स्वतन्त्र पार्टीलाई उभ्याएको दाबी गर्नुभयो ।
देशमा बेथिति बढ्यो
उहाँले देशमा बेथिति बढ्दै गइरहेको पनि बताउनुभयो ।
गणतन्त्रका लागि लडेका दलहरू सत्तामा गएर पनि भ्रष्टाचार, महङ्गी, बेथिति र कुशासन बढेकोमा उहाँले चिन्ता व्यक्त गर्नुभयो ।
देशमा महङ्गी, भ्रष्टाचार, सहकारी बेथिति, कुशासन कायम हुँदा युवाशक्तिको विदेश पलायन बढ्दै गएको छ’ उहाँले भन्नुभयो– ‘यसबाट देशमा देशभक्तिको भावनामा पनि ह्रास आइरहेको छ ।’
उहाँले देशको सामु आइपरेको प्रतिगमनको खतरा तथा महङ्गी, बेथिति, भ्रष्टाचारको विरुद्ध आवाज उठाउन पत्रकारहरूसित आग्रह गर्नुभयो ।
कार्यक्रममा पत्रकार महासङ्घ दाङका अध्यक्ष दुर्गालाल केसी, प्रेस काउन्सिलका सदस्य शरद अधिकारी, पत्रकार महासङ्घ दाङका पूर्व अध्यक्षहरू केबी मसाल, प्रताप सिंहलगायतको उपस्थिति रहेको थियो ।
