हैदराबाद । मूल प्रवाह अखिल भारत नेपाली एकता समाज मध्य दक्षिण क्षेत्रीय समितिको आयोजनामा १ दिने प्रशिक्षण सम्पन्न भएको छ ।
आइतबार एक कार्यक्रमको आयोजना गरी सदस्यहरुलाई विभिन्न सैद्धान्तिक विषयमा प्रशिक्षण दिइएको हो ।
कार्यक्रममा समाजका केन्द्रीय उपाध्यक्ष प्रेम पौडेलले संगठनात्मक सिद्धान्तका साथै समसामयिक राजनीतिक विषयमा प्रशिक्षण दिनुभएको थियो ।
त्यसक्रममा नेता पौडेलले अहिलेको सुविधाजनक र उपभोक्तावादी चिन्तन बोकेको परिवेशमा नीति सिद्धान्तको रक्षा गर्दै समाज रुपान्तरणका लागि निरन्तर रुपमा आन्दोलनमा सक्रिय हुन सहि विचार चाहिन्छ भन्नुभयो ।
‘सहि विचारको सिर्जना जनताको जीवन्त सम्बन्धको व्यवहारिक पक्षबाट प्राप्त हुन्छ । प्राप्त सामाजिक व्यवहारको ज्ञानलाई संगठन को माध्यम बाट बिकास गर्दै लैजानुपर्ने आबास्यक्ता हुन्छ’ उहाँले भन्नुभयो, ‘त्यो आवश्यक्ता पूरा गर्नको लागि संगठनलाई परिचालन गर्ने सिद्धान्त चाहिन्छ । त्यो सिद्धान्त द्वन्द्वात्मक भौतिकवादी दर्शनको आलोकबाट पूरा हुन सक्तछ ।’
भिमबहादुर थापाको अध्यक्षता, तिलक रानाको सञ्चालन तथा घनश्याम शर्माले स्वागत गर्नुभएको कार्यक्रममा केन्द्रीय सदस्य तथा मध्य दक्षिण क्षेत्रीय अध्यक्ष रामप्रसाद पौडेलले दर्शन सम्बन्धी प्रशिक्षण दिनुभएको थियो ।
