काठमाडौं । ‘ग्रामिण पर्यटनसँग त्यहाँका जनताको भाषा, संस्कृति र लोकजीवन जोडिएको हुँदा यो विषयलाई विशेष महत्व दिनुपर्ने’ नेकपा(मसाल)का महामन्त्री तथा साहित्यकार मोहनविक्रम सिंहले बताउनुभएको छ ।
साहित्य परिषद,प्यूठान काठमाडौं सम्पर्क समितिले आयोजना गरेको बृहत भेलालाई प्रमुख अतिथिको रुपमा सम्बोधन गर्दै उहाँले, ‘ग्रामीण पर्यटन मुलुककै समृद्धिको समेत आधार भएको’ बताउनुभयो ।
सोमबार (साउन २३ गते) देवकोटा सभाकक्ष, नेपाल प्रज्ञा प्रतिष्ठानमा भएको कार्यक्रममा नेता सिंहले ०७ सालको इतिहाससमेत कोट्याउँदै, कांग्रेस नेता अनिरुद्र शर्मा, प्रशासकीय व्यक्तित्व प्रतिमान बोहरा र आफूसहित प्यूठान जिल्लाको शिक्षाको विकासको लागि संयुक्तरुपमा अगाडि बढेको बताउँदै ‘अहिलेको सन्दर्भमा प्यूठानको कला, साहित्य, संस्कृतिको समृद्धिको लागि सबै जिल्लावासी जनता एकजुट भएर अगाडि बढ्नुपर्ने’ बताउनुभयो ।
झिम्रुकमा तयार भैरहेको रक गार्डन देशकै पर्यटनको आधार भएको बताउँदै ‘प्यूठान साहित्य महोत्सवलाई सफल पार्न सबै क्षेत्रबाट उल्लेखनीय भूमिका हुनुपर्ने’आवश्यकता माथि जोड दिनुभयो ।
साहित्य परिषद, प्यूठान काठमाडौं सम्पर्क समितिका संयोजक समीर सिंहको अध्यक्षता तथा समितिका सदस्य भावेश भुमरीको सञ्चालनमा अगाडि बढेको कार्यक्रममा प्राज्ञ डा.गोपिन्द्र पौडेलले प्यूठान साहित्य महोत्सवको औचित्यमाथि प्रष्ट पार्नुभएको थियो ।
प्युठानबाट निर्वाचित सांसद एवम् राष्ट्रिय जनमोर्चाका उपाध्यक्ष दुर्गा पौडेलले प्युठानको पर्यटन विकासको लागि विभिन्न योजना बनाएको जानकारी दिँदै कला, साहित्यले जिल्लाको विकासमा महत्त्वपूर्ण भूमिका खेल्ने बताउनुभयो ।
‘साहित्य, कला, संस्कृति भन्दामाथि वर्ग हुने’ बताउँदै माओवादी नेता लिलामणि पोख्रेलले ‘सामाजिक विकृति तथा विसङ्गतिका विरुद्ध सचेतनामा साहित्यको विशेष भूमिका हुने’ बताउनुभयो ।
‘क.मोहन विक्रम सिंहको जीवनको उत्तरार्द्धमा साहित्य र कलाको क्षेत्रमा महत्वपूर्ण योगदान रहेको’ बताउँदै एमाले नेता तथा साहित्यकार मणि थापाले ‘देशलाई चिनाउन भौतिक विकासले मात्र होइन कला, साहित्यको पनि महत्वपूर्ण भूमिका हुन्छ’ भन्नुभयो । उहाँले ‘कला र साहित्यलाई राजनीतिले नेतृत्व गर्नुपर्ने’ समेत बताउनुभयो ।
कार्यक्रमलाई सम्बोधन गर्दै राष्ट्रिय योजना आयोगका पूर्वअध्यक्ष तथा कांग्रेस नेता डा.गोविन्दराज पोख्रेलले ‘साहित्यले राजनीति र समाजलाई राम्रो सन्देश दिने’ बताउँदै ‘समाज परिवर्तनमा साहित्य र राजनीतिको मिलन हुनुपर्ने’ बताउनुभयो ।
कार्यक्रममा नेपाल संगीत तथा नाट्य प्रज्ञा प्रतिष्ठानका उपकुलपति हरिहर शर्मा, प्यूठान नगरपालिकाका मेयर विष्णु योगी, प्यूठान साहित्य परिषदका अध्यक्ष नवराज आचार्य, उद्योगी भरत आचार्य, कलाकार मदनकृष्ण शर्मा, राजनैतिक व्यक्तित्वहरु देवीराम रिजाल, भोजविक्रम बुढा, खगेश्वर के.सी., रामबहादुर बुढाका साथै विजयराज आचार्य, गुणप्रसाद आचार्य, लुना रिजाल, मदन के.सी., विमल पा्ख्रेल, शान्ता जि.सी., जीवराज भट्टराई, मनु वि.क., अस्मीता के.सी., धु्रव बस्याल लगायतले प्यूठानमा साहित्यलाई अझ प्रष्फुटित गर्दै जानुपर्ने आवश्यकतामाथि जोड दिनुभएको थियो ।
