रवि पौडेल ##

जन्मको आधारमा वंशजको
नागरिकता दिनु धोका हो
प्रधानमन्त्रीको भारत भ्रमण
राष्ट्रघातको पोका हो

प्रभु खुसी पार्न भनी किन गर्छौ नाटक
धेरै भयो गर्न ला’को राष्ट्रघाती चटक
गण्डकी र कोशी बेची छैन तिनलाई पछुतो
महाकालीमा राष्ट्रघातले रहेन अछुतो

सम्झौतामा राष्ट्रघात लहरै देखिन्छ
बिप्पा पनि सम्झौताको उपहार देखिन्छ
अरुण र कर्णालीमा राष्ट्रघातको खेल
राष्ट्रघात गर्नेहरू कहिले जान्छन जेल ?

खरिदबिक्री ठेक्कापट्टा कमिसनको राई
प्रकृतिमा नेताहरूले गरी राइँ र दाइँ
गिट्टी, बालुवा, पानीदेखि मानिस बेच्न थाले
सरकार पनि यिनैको छ फुर्ती लाउछन भाले

जनता हाम्रो दिमाग पनि गोबरै भरेको
हत्यारा र भ्रष्टाचारीलाई साथ दिनुपरेको
कमजोर बुद्धि जनताको फाइदा लिने नेता
थोरै कलो खान पाए’सी साथ कार्यकर्ता

फिजीकरण हुनबाट देश जोगाउनुपर्छ
राष्ट्रघातका शृङ्खला खारेज गर्नुपर्छ
राष्ट्रघात र जनघातले मुटु पिरो भयो
मुटुमाथि ढुङ्गा राखी आधा जीवन गयो

कार्यकर्ता लम्पट भए सर्वहारा छैन
लुटी लुटी देश सके सुधार्ने काम हैन
जनता जागरुक कहिले हुने देश बचाउन
राष्ट्रघाती दलालहरू नेता भगाउन