भिवानी । मूल प्रवाह अखिल भारत नेपाली एकता समाज महिला नगर विभाग भिवानीको आयोजनामा प्रगतिशील तिजी कार्यक्रम सम्पन्न पारिएको छ ।
उर्मिला कोपिलाको अध्यक्षता, बिमला जिसीको सञ्चालन र अमृता बिकको स्वागत मन्तव्यबाट अगाडि बढेको उक्त कार्यक्रममा सर्वप्रथम सहिदको सम्मानप्रति एकमिनेट मौनधारण गरिएको थियो ।
उक्त कार्यक्रमका प्रमुख अतिथि मूल प्रवाह पश्चिमोत्तर क्षेत्रीय समितिका सदस्य गोवर्धन बिकले दिप प्रज्वलित गरि तिजी कार्यक्रमको उद्घाटन गर्नुभएको थियो । उद्घाटन मन्तव्यमा उहाँले महिलाहरू शिक्षित नहुनको कारण नै महिलाहरू माथि थिचोमिचो हुने कुरा बताउनुभयो । मूल प्रवाहले आफ्नो स्थापना कालदेखि नै श्रमजीवी जनतालाई सचेत गराउने कार्यमा निरन्तर पहल गर्दै आइरहेको जोड दिनुभएको थियो ।
क्षेत्रीय समितिका सल्लाहकार डिलबहादुर भट्टराई, नगर समिति भिवानीका संस्थापक सदस्य वीरबहादुर कोपिला र नगर समितिका उपाध्यक्ष जामन सिंह बिकले पनि शुभकामना मन्तव्य राख्नुभएको थियो ।
