काठमाडौं । नेपाल कम्युनिस्ट पार्टी (मसाल) ले डा. जगमान गुरुङले महामन्त्री मोहनविक्रम सिंहबारे भ्रामक अभिव्यक्ति दिएको बताएको छ ।

डा. गुरुङले मोहनविक्रम सिंह, मोहन वैद्य, नारायणमान विजुक्छे(रोहित)ले नेपालमा राजा चाहिन्छ भनेर दिएको अभिव्यक्ति सिंहको सन्दर्भमा पूरै कपोलकल्पित भएको मसालले स्पष्ट पारेको छ ।

प्रवक्ता रामप्रकाश पुरीले बुधबार एक स्पष्टीकरण प्रेसित गर्दै महामन्त्री सिंहले डा. गुरुङले भने झैँ राजा चाहिन्छ भनेर कतै पनि अभिव्यक्ति नदिएको कुरा स्पष्ट पार्नुभएको छ ।

यस्तो छ स्पष्टीकरण
डा. जगमान गुरुङले मोहनविक्रम सिंह, मोहन वैद्य, नारायणमान विजुक्छे(रोहित)ले नेपालमा राजा चाहिन्छ भनेर भनेको भनी एउटा कुनै कार्यक्रममा अभिव्यक्ति दिनुभएको छ । का. मोहन वैद्य र का. नारायणमान विजुक्छेले उहाँहरू आफैले त्यसबारे आफ्नो स्थितिलाई स्पष्ट गर्नुहोला । यहाँ हामीले का. मोहनविक्रम सिंहबारे डा. गुरुङको जुन अभिव्यक्ति प्रकट भएको छ, त्यसबारे स्पष्टीकरण दिन चाहन्छौँ ।

सर्वप्रथम, हाम्रो पार्टीका महामन्त्री का. मोहनविक्रम सिंहले डा. गुरुङले भने झैँ राजा चाहिन्छ भनेर कतै पनि अभिव्यक्ति नदिएको कुरा स्पष्ट गर्न चाहन्छौँ । नेपालमा गणतन्त्र र धर्मनिरपेक्षताका विरुद्ध प्रतिगामीहरूले लगातार अभियान चलाउँदै आएका छन् । त्यस सन्दर्भमा प्रतिगमनका विरुद्धको संघर्ष देशको वर्तमान स्थितिमा प्रमुख आवश्यकता बन्न गएको कुरा का. मोहनविक्रम सिंहले लगातार जोड दिँदै आउनुभएको छ । २०८० मंसिर ०५ गते जारी वक्तव्यमा पनि मंसीर ०७ गते प्रतिगामी उद्देश्यका साथ आयोजना गर्न थालिएको प्रदर्शनको विरोध गर्दै उहाँको वक्तव्य प्रकाशित भएको छ । त्यसरी डा. जगमान गुरुङले का. मोहनविक्रम सिंहबारे दिनुभएको अभिव्यक्ति पूरै झुट्टा र कपोलकल्पित भएको कुरा स्पष्ट छ ।

डा. गुरुङले मोहनविक्रम सिंहले राजा चाहिन्छ भनेको प्रमाणको रुपमा पछिल्लो समयमा जीवनारायण भण्डारीले योहो टेलिभिजनमा मोहनविक्रम सिंहसित लिनुभएको अन्तर्वार्तालाई उल्लेख गर्नुभएको छ । त्यो अन्तर्वार्ताको भिडियो हामीसित पनि सुरक्षित छ र सामाजिक सञ्जाल वा युट्युवमा पनि त्यो अन्तर्वार्ता जो कसैले पनि हेर्न र सुन्न सक्दछन् । त्यो अन्तर्वार्तालाई पूरै हेर्ने वा सुन्ने हो भने पनि त्यहाँ राजा वा राजतन्त्रको विरोध गरिएको कुरा स्पष्ट छ ।

त्यसरी डा. गुरुङले त्यो अन्तर्वार्तामा मोहनविक्रम सिंहले राजा चाहिन्छ भनेको भनी जुन प्रमाण उल्लेख गर्नुभएको छ, त्यसमा त्यो कुरा कतैपनि नभएकोले डा गुरुङले मोहनविक्रम सिंहबारे जुन अभिव्यक्ति दिनुभएको छ, त्यो पूरै झुट्टा र निराधार भएको कुरा स्पष्ट गर्दछौँ ।

२०८० मंसीर ०६ गते ।

रामप्रकाश पुरी
प्रवक्ता