नयाँ दिल्ली । सहिद सरोज शर्मा (शोभाखर धनञ्जय) को अठतिसौँ स्मृतिदिवस (भदौ ११) मा मूल प्रवाह अखिल भारत नेपाली एकता समाजले उहाँप्रति भावपूर्ण श्रद्धाञ्जली व्यक्त गरेको छ । समाजका केन्द्रीय अध्यक्ष ठाकुर खनालद्धारा हस्ताक्षरमा २०८१ भदौ ११ गते तदानुसार २७ अगस्त २०२४ का दिन प्रेसवक्तव्य जारी गर्दै सिंगो संगठनको तर्फदेखि खनालले श्रद्धाञ्जली व्यक्त गर्नु भएको हो ।

प्रेसवक्तव्यमा सहिद सरोज शर्मालाई संगठनको जुझारु, अनुशासित, कर्तव्यनिष्ठ र दृढनिश्चयी सदस्य रहेको बताइएको छ ।
श्रमजिवी वर्गको पक्षमा देखापर्ने विभिन्न भड्कावका विरुद्ध संघर्ष गर्दै अगाडि बढ्ने प्रण गरिएको प्रेसवक्तव्यमा अगाडि भनिएको छः “हाम्रो महान् र निरन्तर क्रान्ति अभियानमा का. सरोज शर्माका सपना सर्वदा जीवित रहने छन् र उहाँको योगदानलाई सदा स्मरण गरिने छ ।”

स्मरण रहोस्ः २०४२ सालको बमकाण्डको आरोपमा भूमिगत हुनुपरेपछि सहिद सरोज शर्मा दिल्ली पुगेर “नेपाली एकता” पत्रिकाको सहसम्पादक बनेर काम गर्नुभएको थियो । सोही क्रममा २०४३ साल भदौ ११ गते नयाँ दिल्लीको बेलारोडमा पत्रिका विक्रीवितरण गर्न जाँदा उहाँले सहादत प्राप्त गर्नुभएको थियो ।

यस्तो छ, प्रेसवक्तव्यको पूर्ण पाठ :

‘का. सरोज शर्मा (शोभाखर धनञ्जय) हाम्रो संगठनको जुझारु, अनुशासित, कर्तव्यनिष्ठ र दृढनिश्चयी नेता हुनुहुन्थ्यो । संगठनको जिम्मेवारी पूरा गर्ने क्रममा उहाँको मृत्यु भएको थियो र त्यसरी संगठनले उहाँलाई सहिद मान्दै आएको छ । आज उहाँको स्मृतिदिवस हो । हामीले उहाँप्रति हार्दिक श्रद्धाञ्जली व्यक्त गर्दछौँ ।

हाम्रो संगठनले स्थापनाकालदेखि नै कैयौँ आरोह र अवरोह झेल्दै क्रान्तिकारी अभिभारा पूरा गर्दै आएको छ । श्रमजिवी वर्गको विचारको रक्षाको प्रश्न नै हाम्रो संगठनको वर्तमानको मुख्य अभिभारा हो । हामीले सही कार्यदिशा निश्चित गरी देश तथा प्रवासमा रहने श्रमजिवी नेपालीहरुको बीचमा महत्वपूर्ण भूमिका खेल्दै क्रान्तिको विचारको रक्षा गर्न सक्ने छौँ । हामीले दृढतापूर्वक भन्दछौँ कि सबै खालका भड्कावबाट संगठनको रक्षा गर्न हाम्रा अगाडि आउने सबै चुनौतिको सामना गर्न हामी तयार छौँ र रहिरहने छौँ । हाम्रो महान् र निरन्तर क्रान्ति अभियानमा का. सरोज शर्माका सपना सर्वदा जीवित रहने छन् र उहाँको योगदानलाई सदा स्मरण गरिने छ ।”