काठमाडौँ । नेकपा (मसाल) ले भारत भ्रमणमा रहनुभएका प्रधानमन्त्री पुष्पकमल दाहाल प्रचण्डलाई विदेश राज्यमन्त्रीद्वारा स्वागत गरिनुलाई अपमानजनक रवैया बताएको छ ।

महामन्त्री मोहनविक्रम सिंहको हस्ताक्षरमा २०८० जेठ १८ गते बिहिबार जारी प्रेसवक्तव्यमार्फत् पार्टीले सो धारणा व्यक्त गरेको हो ।

प्रचण्ड सरकारले संविधान र संसदीय प्रक्रियाको समेत अतिक्रमण गरेर नागरिकता विधेयक प्रमाणित गर्नु भनेको भारतलाई खुसी बनाउने प्रयत्न हो भन्दै वक्तव्यमा उक्त विधेयकबाट राष्ट्रियतामाथि गम्भीर घात भएकाले त्यसको विरुद्ध आवाज उठाउन जनतासित अपिल गरिएको छ ।

कोशी प्रदेश नामकरणको सन्दर्भमा जातिवादको विजारोपण भएको पार्टीको ठहर छ । अब सुदूरपश्चिम प्रदेशको पनि पुन: जातिवादी प्रकारले नामकरणको माग उठेको भन्दै प्रेसवक्तव्यमा देश पुन: जातिवादी युद्धमा धकेलिने खतरातर्फ गएकाले त्यसतर्फ सचेत हुन आग्रह गरिएको छ ।

यस्तो छ, प्रेसवक्तव्यको पूर्ण पाठ :

“भारत भ्रमणमा रहेका नेपालका प्रधानमन्त्री पुष्पकमल दाहाल प्रचण्डको भारतले विदेश राज्यमन्त्रीद्वारा स्वागत गराएर अपमानजनक व्यवहार गरेको छ । त्यसका साथै असहज संवाद भएका समाचार पनि सार्वजनिक भएका छन् । नेपाल र भारतबिच रहेका समस्याबारे भारतले उपेक्षा गरेकाले ती विषयबारे कुनै छलफल हुने सम्भावना देखिन्न । भारतको त्यस प्रकारको व्यवहारबाट प्रधानमन्त्री प्रचण्डको भ्रमण उपलब्धिहीन भई खाली हात फर्किनुपर्ने सम्भावना बढेर गएको छ ।

राष्ट्रपतिबाट विवादित राष्ट्रघाती नागरिकता विधेयक प्रमाणीकरण भएको छ । त्यो विधेयक प्रमाणीकरण गर्दा संवैधानिक र संसदीय प्रकृयाको पनि अतिक्रमण गरिएको कुरा संविधानविदहरूले बताएका छन् । राष्ट्रपतिद्वारा त्यस प्रकारको विधेयकलाई प्रमाणीकरण गर्न लगाएर सरकारले राष्ट्रपतिको पनि नराम्ररी बद्नाम गराएको छ । त्यो विधेयकबाट देशको राष्ट्रियता र स्वाधीनतामा गम्भीर आँच पुग्ने कुरा निश्चित छ ।

प्रधानमन्त्री प्रचण्डको भारत भ्रमणकै बेलामा उक्त राष्ट्रघाती नागरिकता विधेयक प्रमाणीकरण गर्नुको मुख्य उद्देश्य भारतलाई खुसी तुल्याउनु नै हो । भारतले आफ्ना साम्राज्यवादी हित पूरा गराउनका लागि नेपालको नागरिकतासम्बन्धी कानुनलाई आफूअनुकूल बनाउन प्रयत्न गर्दैै आएको छ । अहिले राष्ट्रपतिबाट प्रमाणीकरण भएको विवादित र राष्ट्रघाती उक्त नागरिकता विधेयकबाट देशको राष्ट्रियतामाथि गम्भीर घात भएको छ । हामीले उक्त राष्ट्रघाती विधेयक खारेजीको लागि जनतालाई सङ््घषमा उत्रिन आह्वान गर्दछौँ ।

पुन:नामकरणलाई लिएर कोशी प्रदेशमा भएको तनावलाई हाम्रो पार्टीले गम्भीर रूपमा लिएको छ । पश्चिमा साम्राज्यवादीले नेपालमा जातिवादी राज्यका पक्षधरलाई उक्साउँदै आएका छन् । नेपालमा जातीय अहम्तालाई उक्साएर प्रदेशका नामकरण गर्ने प्रयत्न पहिलेदेखि नै हुँदै आएको भए पनि नेपाली जनताले त्यसका विरुद्धमा आफ्नो अभिमत प्रकट गर्दै सामाजिक सद्भावलाई कायम राख्न सफल भएका थिए । त्यस सिलसिलामा कोशी प्रदेशको नामकरण पनि उपयुक्त र सही थियो भन्ने हाम्रो दृढ मत रहेको छ । अब सुदूरपश्चिममा पनि नागरिक उन्मुक्ति पार्टीले जातीय आधारमा नै त्यो प्रदेशको नामकरण गर्ने अगाडि ल्याएको छ । यसरी अहिले कोशी प्रदेशको पुन:नामकरणलाई लिएर जुन तनाव भएको छ, त्यसबाट जातिवादको गम्भीर विजारोपण हुने र भविष्यमा देश गम्भीर जातिवादी युद्धमा धकलिने खतरा बढेर गएकाले जातिवादका विरुद्ध सजग रहनका लागि हामीले सम्पूर्ण देशभक्त जनताको ध्यान आकर्षित गर्दछौँ ।”