काठमाडौँ । राष्ट्रिय जनमोर्चाले जाजरकोटका भूकम्पपीडितको समस्याप्रति समुचित ध्यान दिन सरकारसित आग्रह गरेको छ ।

जाडो मौसम सुरु भएसँगै औषधी, कपडा, खाद्यान्न, बासस्थानसमेतको अभावमा दस जनाभन्दा बढीको ज्यान गइसकेको सन्दर्भमा राजमोको यस्तो धारणा आएको हो ।

राजमो उपाध्यक्ष तथा प्रवक्ता दुर्गा पौडेलको हस्ताक्षरमा २०८० मङ्सिर १० गते आइतबार जारी प्रेसवक्तव्यमा पार्टीले भूकम्पपीडित क्षेत्रमा राहत पर्याप्त नभएको तथा त्यसको वितरण पनि समुचित हुन नसकेकोमा ध्यानाकर्षण गराइएको छ ।

त्यस्तै, वक्तव्यमा देशका क्याम्पस तथा सामुदायिक विद्यालयमा विद्यार्थी सङ्ख्या कम हुँदै जाँदा क्याम्पसहरू मर्ज गर्नुपर्ने अवस्थामा रहेको विषय पनि उल्लेख गरिएको छ ।

सामुदायिक विद्यालयमा पढाइको स्तर कमजोर भएकाले निजी वा बोर्डिङ स्कुलतर्फ विद्यार्थीको आकर्षण बढेको वक्तव्यमा किटानी गरिएको छ ।

शिक्षा क्षेत्रमा देखा परेको यस खालको सङ्कटतर्फ सम्पूर्ण राष्ट्रप्रेमी र सरकारसमेतको ध्यान आकर्षित गराइएको उक्त वक्तव्यको पूर्ण पाठ यस्तो छ :

“रुकुम र जाजरकोटमा आएको भूकम्पबाट गम्भीर धनजनको क्षति भएको कुरा सबैलाई थाहा भएको कुरा हो तर भूकम्पबाट भएको क्षतिभन्दा त्यसपछि जाडो तथा आवश्यक औषधी, कपडा, खाद्यान्न, बस्ने व्यवस्थासमेतको अभावमा मानिसहरू अत्यन्त पीडित हुन पुगेको र ती कारणबाट १० जनाभन्दा बढी मानिसको ज्यानसमेत गइसकेका घटनाप्रति हाम्रो पार्टीको गम्भीर ध्यान आकर्षित भएको छ । त्यो अत्यन्त चिन्ताजनक समस्या हो । त्यसका लागि सरकारले केही न केही व्यवस्था गरिरहेको कार्यप्रति पनि हाम्रो ध्यान छ तर अहिलेको जाडोको मौसममा तथा त्यहाँको दुर्गम भौगोलिक अवस्थामाथि समेत ध्यान दिँदा अहिलेसम्म भएको व्यवस्था र राहत पर्याप्त नभएको कुरा प्रष्ट छ । त्यसका साथै भूकम्पपीडितका लागि प्राप्त राहत पनि समुचित रूपले वितरण हुन नसकेकाले वा त्यसमा ढिलाइसमेत हुने गरेकाले त्यससम्बन्धी समस्या झन् गम्भीर भएको छ । त्यसकारण ती सबै कुराप्रति ध्यान दिँदै भूकम्पपीडित मानिसको समस्याको समाधानका लागि शीघ्र र समुचित रूपले ध्यान दिन सबै तहका सरकारसित हामीले अपिल गर्दछौँ ।

देशका क्याम्पसमा विद्यार्थीको सङ्ख्या लगातार घट्दै गइरहेको छ । त्यसको परिणामस्वरूप पठनपाठन हुन नसकेर वा क्याम्पसको खर्चको पनि समस्या भएर कैयौँ क्याम्पसले आपसमा मर्ज गर्दै जानु परिरहेको छ । त्यसरी क्याम्पसको सङ्ख्या लगातार घट्दै गइरहेको छ । सामुदायिक विद्यालयमा पनि विद्यार्थीको सङ्ख्या न्यून हुँदै गइरहेको छ । यो वास्तवमा सम्पूर्ण देशका लागि र भविष्यको लागि समेत गम्भीर सङ्कट हो ।

खास गरेर १२ कक्षा पढेपछि विद्यार्थीहरू देशभित्र नपढेर विदेशमा नै पढ्न वा नोकरी गर्न जाने प्रवृत्ति बढेकाले नै नेपालका क्याम्पसमा पढ्ने विद्यार्थीको सङ्ख्या घट्दै गएको हो । त्यसबाट शिक्षाको क्षेत्रमा सङ्कट आउने कुरामा निश्चित नै छ । शिक्षाको क्षेत्रमा देखा पर्ने त्यो सङ्कटले सम्पूर्ण देशमा नै नकारात्मक र दूरगामी असर पार्ने छ । सामुदायिक विद्यालयमा तल्लो कक्षामा पढ्ने विद्यार्थीको सङ्ख्या पनि कम हुँदै गइरहेको छ । त्यसको कारण यो हो कि सामुदायिक विद्यालयमा पढाइको स्तर सन्तोषजनक नभएको हुनाले उनीहरूले निजी वा बोर्डिङ स्कुलतिर नै बढी आकर्षित हुने गर्दछन् ।

समग्र रूपमा आज शिक्षाको क्षेत्रमा जुन गम्भीर समस्या र सङ्कटसमेत देखा पर्दै गइरहेको छ, त्यसप्रति हामीले सबै राष्ट्रप्रेमी र सरकारको समेत गम्भीर ध्यान आकर्षित गर्न चाहन्छौँ ।”