काठमाडौँ । अखिल नेपाल बुद्धिजीवी सङ्घले “ऐतिहासिक भौतिकवादी दृष्टिकोणमा प्रतिगमन” शीर्षकमा भर्चुअल अन्तरक्रिया कार्यक्रम सम्पन्न गरेको छ ।

प्रगतिशील लेखक सङ्घका महासचिव समीर सिंहको कार्यपत्रमाथि छलफल चलाउँदै २०७८ जेठ २९ गते सो कार्यक्रम सम्पन्न भएको हो ।
कार्यक्रममा मन्तव्य राख्दै राष्ट्रिय जनमोर्चाका केन्द्रीय सचिव हिमलाल पुरीले प्रधानमन्त्री ओलीमा पुँजीवादी व्यवस्थाअन्तर्गतको संसदलाई समेत विघटन गर्ने प्रवृत्ति देखा पर्नु दुखद भएको बताउनुभयो ।

‘पुँजीवादीले सम्म त संसदको संरक्षण गर्नुपर्नेमा प्रधानमन्त्रीले त विघटन गरिदिए’ सचिव पुरीले कार्यक्रममा उपस्थित जनसमुदायप्रति प्रश्न गर्नुभयो– ‘अब उनलाई कम्युनिस्ट त परै जाओस्, प्रगतिशील पनि भन्न मिल्ने कि नमिल्ने ?’

उहाँले आफूलाई कम्युनिस्ट बताउनेले पशुपतिमा सुनको जालहरी राख्ने वा भगवान रामको मन्दिर बनाउने काम गरेकोमा समेत प्रश्न उठाउनुभयो ।

उहाँले भन्नुभयो– ‘पशुपतिमा सुनको जालहरी राख्ने, राममन्दिर बनाउन खोज्ने ओलीको प्रवृत्तिले उनी कम्युनिस्ट होइनन् भन्ने पुष्टि गर्छ ।’

उहाँले राजतन्त्र ढलेर गए पनि सामन्ती चिन्तन अझै बाँकी रहेको बताउँदै भन्नुभयो– ‘सत्तामा सधैँभरि टाँसिइरहन्छु भन्नु सामन्ती प्रवृत्ति हो ।’

‘यदि नेपालमा राष्ट्रपतीय प्रणाली भएको भए के हुन्थ्यो’ उहाँले भन्नुभयो– ‘त्यसो भएको भए त हामीले संसद पुनस्र्थापनाको पक्षमा आवाज उठाउन पनि सक्दैनथ्यौँ ।’

राजमो नेता पुरीले वामपन्थी सङ्कीर्णतावादीले आफूलाई कार्यनीतिविहीन अवस्थामा राखेको बताउनुभयो ।

उहाँले भन्नुभयो– ‘वामपन्थी सङ्कीर्णतावादीहरू रणनीतिलाई चपक्क समातेर बसिरहेका छन्, तात्कालिक राजनीतिसित सम्बन्धित काम गर्नका लागि उनीहरूसित कार्यनीति नै छैन ।’

अवधारणा पत्रमाथि टिप्पणी गर्दै वाम विश्लेषक श्याम श्रेष्ठले राजनीति स्वतन्त्र हुनका लागि अर्थतन्त्र आत्मनिर्भर हुनुपर्ने विचार राख्नुभयो ।

‘राजनीति स्वतन्त्र हुनका लागि अर्थतन्त्र स्वाधीन हुनुपर्यो नि’ उहाँले भन्नुभयो– ‘हामी त अहिले पराधीन छौँ । श्रमशक्ति नै विदेश निर्यात गर्ने देश हो नेपाल ।’

प्रधानमन्त्री ओली नवधनाड्य तप्काबाट आएको बताउँदै उहाँले इसारा गर्नुभयो– ‘यस खालको तप्कासित लोकतन्त्रप्रति लगाव हुँदैन । यस खालका पात्रले विदेशी प्रतिक्रियावादीको दलालीसम्म गर्न सक्छन् ।’

युवा, विद्यार्थी, मिडियासहित आम जनतालाई स्वतन्त्रता चाहिएको बताउँदै उहाँले ओलीको प्रतिगामी कदमले धेरै समय निरन्तरता पाउन नसक्ने बताउनुभयो ।

‘जनता स्वतन्त्रता चाहन्छन्’ उहाँले भन्नुभयो– ‘जनताको स्वतन्त्रता चाहने तीव्र लगावमाझ ओली नेतृत्वको प्रतिगमन धेरै दिन टिक्न सक्ने छैन ।’

अर्का टिप्पणीकार प्रगतिशील लेखक सङ्घका उपाध्यक्ष गोपीरमण उपाध्यायले केपी शर्मा ओली अग्रगामी परिवर्तन चाहने वामपन्थी पङ्क्तिमाझको प्रतिगामी प्रवृत्ति भएको किटानी गर्नुभयो ।

‘अग्रगामी तत्त्वमाझको प्रतिगामी प्रवृत्ति ओली प्रवृत्ति हो’ उहाँले भन्नुभयो– ‘अहिले उनका पछाडि जुन समूह लागिरहेको छ, तिनीहरूमा मण्डले वा भिजिलान्ते प्रवृत्ति तीव्र गतिमा हावी भइरहेको देखिएको छ ।’