विदुर शर्मा, दक्षिण कोरिया ।

नेपाल कम्युनिष्ट पार्टी (मसाल) का महामन्त्री मोहनविक्रम सिंहले नेपालको राष्ट्रियताको आन्दोलनमा प्रवासी नेपालीको भूमिका महत्वपूर्ण रहेको बताउनुभएको छ । नेपाली एकता समाज दक्षिण कोरियाले आयोजना गरेको दुइदिने विशेष राजनीतिक प्रशिक्षण कार्यक्रममा महामन्त्री सिंहले प्रवासी नेपालीको योगदानको प्रशंसा गर्नुभएको हो ।

महामन्त्री सिंहले वैदेशिक रोजगारीका लागि विश्वका विभिन्न देशमा पुगेका नेपालीहरुले नेपालको वामपन्थी आन्दोलनमा महत्वपूर्ण योगदान दिएको बताउनुभयो । उहाँले विदेशस्थित नेपालीहरु जो जहाँ छन् त्यहीँबाट संसदको निर्वाचनमा मतदान गर्ने व्यवस्थाका लागि आफ्नो पार्टीले संघर्ष गरिरहेको विषयमा पनि जानकारी दिनुभयो ।

विश्वव्यापी कोरोना भाइरसको संक्रमणका बावजुद विदेशमा संगठन निर्माण र नेपालीहरुको समस्याविरुद्ध जुधिरहेकोमा नेपाली एकता समाजलाई धन्यवाद पनि दिनुभयो । सिंहले देशभित्र बाढी, पहिरोलगायतका प्राकृतिक विपत्तिमा परेका नागरिकलाई सहयोग तथा विकास निर्माणमा पनि प्रवासी नेपालीको महत्वपूर्ण योगदान रहँदै आएको चर्चा गर्नुभयो ।

पार्टीमा आठौं महाधिवेशनको सेरोफेरोमा देखिएको ध्वसांत्मक प्रवृतिको सामान्य चर्चा गर्दै उहाँले पार्टीले अनुशासन र एकता कायम राख्न ‘सुद्धिकरण अभियान’ सञ्चालन गरिरहेको जानकारी दिनुभयो ।

यस्तै, राष्ट्रिय जनमोर्चाका अध्यक्ष चित्रबहादुर केसीले बर्तमान सरकारले जनभावना अनुसार कुनै काम गर्न नसकेको आरोप लगाउनुभयो । उहाँले सरकार भ्रष्टहरुको संरक्षक बनेको बताउनुभयो । भारत र विभिन्न देशबाट कोरोनाका कारण हजारौं नेपाली कष्ट सहेर स्वदेश फर्किएपनि देशमा रोजगारीको कुनै सम्भावना नभएपछि फेरि ज्यान जोखिममा राखेर उतै फर्किन बाध्य भएको केसीले बताउनुभयो ।

युवाहरुलाई देशभित्रै रोजगारी सिर्जना गर्न र भ्रष्टाचार नियन्त्रण गर्न सरकारसँग कुनै योजना नभएको उहाँले बताउनुभयो । अध्यक्ष केसीले संघीयताका कारण जनता चर्को करको मारमा परेका उल्लेख गर्दै यसले राष्ट्रियतालाई समेत कमजोर बनाएको बताउनुभयो ।

नेकपा (मसाल) का प्रवक्ता रामप्रकाश पुरीले पनि प्रशिक्षण दिनुभएको कार्यक्रममा विश्व दृष्टिकोण, नेपालका राजनीतिक पार्टीहरुको विश्लेषण, वर्गहरुको विश्लेषणका साथै पार्टी र अन्तरबिरोध लगायत समसामयिक विषयमा प्रशिक्षण दिइएको थियो ।

प्रबिधीमैत्री तवरमा सम्पन्न प्रशिक्षण कार्यक्रम समाजका अध्यक्ष विदुर शर्माको अध्यक्षता र बिष्णु पुनको सन्चालनमा कोरियन चाड ‘छुसक’ को अवसरमा आयोजना गरिएको हो । छुसक भनेको आफ्ना परिवारका दिवङ्गत सदस्यको सम्झनामा उनिहरुप्रती श्रद्धा भाव सहित पुजा गरिने कोरियाको ठूलो पर्व हो ।

नेपालीहरुको वैदेशिक रोजगारीको आकर्षक गन्तव्य दक्षिण कोरिया पनि वैश्विक रुपमा फैलिएको कोरोना भाइरसको संक्रमणबाट प्रभावित बनेको छ । यहाँ हालसम्म २४ हजार १०२ जना संक्रमित भएका छन् भने ४२४ जनाको मृत्यु भएको छ । आजमात्रै ७५ जना थप संक्रमित थपिएका छन् । कोरियामा हालसम्म ८ जना नेपालीमा संक्रमिण देखिएको छ ।