प्रवासी नेपालीहरुलाई मताधिकारको व्यवस्था मिलाउन दुर्गा पौडेलको माग

English English Nepali Nepali

काठमाडौं । राष्ट्रिय जनमोर्चाका सांसद दुर्गा पौडेलले विदेशस्थित नेपालीलाई आफू कार्यरत देशबाटै मतदानको व्यवस्था मिलाउन माग गर्नुभएको छ ।

बिहीबार संसदमा बजेटको प्राथमिकता र सिद्धान्तबारेको छलफलमा भाग लिँदै राजमोका उपाध्यक्ष एवम् प्रवक्तासमेत रहेकी सांसद पौडेलले विदेशमा रहेका नेपालीलाई देशको आम निर्वाचनमा भोट हाल्ने अधिकार छ भन्नुभयो ।

‘विदेशस्थित नेपालीलाई देशमा हुने आम चुनावमा आफू रहेको देशबाट भाग लिने अधिकार छ’ उहाँले भन्नुभयो, ‘उनीहरूले अहिलसम्म आफ्नो त्यो अधिकार प्रयोग गर्न पाइरहेका छैनन् । सर्वोच्च अदालतले त्यो अधिकार प्रयोग गर्न दिने निर्देशन गरेको छ भने निर्वाचन आयोगले आफूले त्यो व्यवस्था गर्न तयार रहेको कुरा सार्वजनिक गरिसकेको स्थितिमा जनताको प्रतिनिधि संस्था नेपाल सरकार त्यसका लागि तयार नहुनु दुःखको कुरा हो । हामीले आगामी आम चुनावमा नै त्यो व्यवस्था गर्न माग गर्दछौँ ।’

पौडेलले संघीयता अन्तर्गतको प्रदेश संरचना खारेज गरी त्यसको खर्च विकास निर्माणमा लगाउन माग पनि गर्नुभयो ।
यस्तै उहाँले एमसीसी सम्झौता नेपालको संविधानले परिकल्पना गरेको आर्थिक नीतिविरुद्ध र देशहित विरुद्ध रहेको भन्दै खारेज गर्न माग गर्नुभयो ।

‘निजी क्षेत्रलाई प्राथमिकता दिनुको अर्थ उदार अर्थन्त्रलाई प्रश्रय दिनु हो। उदार अर्थतन्त्रले संविधानमै व्यवस्था भएको समाजवादउन्मुख नीतिको कार्यान्वयनमा बाधा पु¥याउँछ’ पौडेलले भन्नुभयो, ‘एमसीसीले उदार अर्थतन्त्रलाई जोड दिएको छ। त्यसकारण त्यो हाम्रो राज्यको समाजवादउन्मुख नीतिको विरुद्ध छ । त्यसलाई खारेज गर्नुपर्दछ ।’

पौडेलले भारतसँगको असमान व्यापार कटौती गर्न, महंगी र भ्रष्टाचार नियन्त्रण तथा शिक्षा र स्वास्थ्यमा राज्यको लगानी बढाउन आवश्यक रहेको बताउनुभयो ।

प्रतिक्रिया दिनुहोस !

सम्बन्धित समाचार