नयाँ दिल्ली । नेपाली श्रमिकहरुको अवस्था झन भन्दा झन दयनीय बन्दै गएको र पटक–पटक नेपाली दूतावास, परराष्ट्र मन्त्रालय, प्रधानमन्त्रीको कार्यालयलाई पत्राचार गरि एवं समय समयमा फोनमा वार्ता गर्दा पनि सरकार र सरकारको सम्बन्धित निकायबाट कुनै सुनुवाई नभएकोप्रति मूल प्रवाह अखिल भारत नेपाली एकता समाजको गम्भिर ध्यानाकर्षण भएको बताएको छ । समाजका केन्द्रीय अध्यक्ष दुर्गा बहादुर केसीले शुक्रबार एक प्रेस वक्तव्य जारी गरि भारतमा नेपालीहरु भोक र चिन्ताले बिमारी परेको, कैयौंले डिप्रेशन भएर आत्महत्या समेत गरेका घटनाहरु भइरहेको जनाउनु भएको छ ।

“भारतका कतिपय राज्यहरुका डिस्ट्रीक मजिष्ट्रेटहरुको सिफारिसमा विभिन्न राज्यहरुका प्रवासी मजदुरहरुलाई आ–आफ्नो घर पठाउने योजना भित्र पारेर कतिपय मालिकहरुले आफ्ना नेपाली श्रमिकहरुलाई पनि सिफारिस गरि पठाएर जिम्मेवारीबाट पन्छिरहेका छन् । त्यसरी प्रशासनद्वारा पठाइएको रेल–वसद्वारा पठाइएका नेपालीहरु मजदुरहरु भारतका विभिन्न जक्शनहरुमा अलपत्र परिरहेका छन् ।” केसीले वक्तव्यमा भन्नु भएको छः “यदि कुनै उपायद्वारा बर्डरसम्म पुगेता पनि झन् ठुलो विचल्ली हुने निश्चित छ । यो नयाँ समस्या थपिएको छ ।”

कतिपय यातयात व्यवसायीहरुले नेपाल जाने व्यवस्थापन भएको भनि भ्रम श्रृजना गरिरहेको समाचारप्रति हाम्रो गम्भिर ध्यानाकर्षण भएको जनाउँदै वक्तव्यमा लेखिएको छः “कैयौं व्यक्तिहरुले हाम्रो कार्यालयमा त्यसको पुष्टिका लागि फोन सम्पर्क गरिरहेका छन्, उनीहरुको रिपोर्ट अनुसार कतैकतै मूल प्रवाहको नाम पनि प्रयोग गरिएको छ । यो सरासर बदमाशी हो र हाम्रो संगठनलाई बदनाम गर्ने षडयन्त्र हो ।” केसीले भन्नु भएको छः– “संगठनको स्थापित छविलाई अनाधिकृत रुपबाट प्रयोग गरि यो अफ्ठ्यारो परिस्थितिमा समेत पैसा कमाउने षडयन्त्र हो । हामी यस प्रकारका गतिविधिहरुको निन्दा गर्दछौं र कुनै पनि दाजु–भाई, दिदी–बहिनीहरुलाई भ्रममा नपर्न अनुरोध गर्दछौं ।”